Мыңдаған шаңырақтың жаңа өмірі

Облыстың Құрылыс, сәулет және қала құры­лы­сы басқармасының дерегінше, өңірде тұрғын үй құ­ры­лысы қарқын алып, баспанаға мұқтаж азаматтарды қол­дау мен ескі тұрғын үй қорын жаңарту қатар жүріп келеді. Кейінгі 3 жылдың ішінде ғана өңірде барлық қар­жыландыру көзі есебінен 2 млн шаршы метр­ден астам тұрғын үй пайдалануға берілді. Осы кезеңде 3 мыңнан астам кезекте тұрған отбасы баспаналы болған.

Жалпы, бұл көрсеткіштің жыл сайын артып келе жат­қаны назар аударарлық. Мәселен, 2023 жылы об­лыста 658,4 мың шаршы метр тұрғын үй пайдалануға берілсе, 2024 жылы 670 мың шаршы метр, ал 2025 жы­лы 703 мың шаршы метр тұрғын үй азаматтардың игі­лігіне тапсырылған. Яғни 3 жылдың ішінде құры­лыс көлемі төмендемей, керісінше тұрақты өсім көр­­­­сеткені байқалды.

– Тұрғын үй құрылысының тұрақты өсуіне бір­қа­­тар фактор әсер етіп отыр. Соның ішін­де мем­ле­кет­тік бағдарламалар, бюджет қаражаты, же­ке ин­вес­тициялар және тұрғын үйді қаржыландырудың түр­лі тетігі маңызды рөл атқарады. Бүгінде бас­ты мін­дет – тұрғын үй құрылысын тек об­лыс орта­лы­­ғында емес, аудандарда да жүйелі түрде дамыту көз­деліп отыр. Сонымен бірге жаңа үйлердің са­па­лы салынуы, инженерлік инфрақұрылым­мен қам­та­масыз етілуі және тұрғындар үшін қолайлы орта қа­лып­тастырылуы жіті назарда, – дейді облыстың Құрылыс, сәулет және қала құрылысы басқармасы басшысының міндетін атқарушы Азамат Байқуанышев.

Еліміздегі тұрғын үй саясатының маңызды бағы­ты – баспанаға мұқтаж азаматтарды, әсіре­се әлеу­мет­тік осал санаттағы тұрғындарды қолдау екені рас. Құзырлы органның статистикасына сенсек, кейінгі 3 жылда 1 747 отбасы жаңа көппәтерлі тұрғын үйлер салу есебінен, тағы 1 857 отбасы тұрғын үй сатып алу тетігі арқылы баспанамен қамтылған. Бұл бағыттағы жұ­мыстар 2023 жылдан бері жүйелі түрде жалға­сып келеді. Мәселен, 2023 жылы облыста 4 көппәтер­лі тұрғын үй салынып, оның ішінде 2 жалдамалы үйдегі 85 пәтер және 2 несиелік үйдегі 105 пәтер пай­далануға берілді. Бұған қоса, әлеуметтік осал са­на­т­тағы азаматтар үшін 251 тұрғын үй сатып алы­нып­ты.

Аймақта 2024 жылы тұрғын үй құрылысының қар­қыны бірден арта түскен. Бір жылдың ішінде 23 көп­пәтерлі тұрғын үйдегі 1 199 пәтер пайдалануға берілді. Оның 122-сі  3 жалдамалы үйде болса, 1 077-сі  20 несиелік үйде орналасқан. Сонымен бір­ге әлеуметтік осал санаттағы азаматтарға арналған 850 тұрғын үй сатып алынған.

Ал 2025 жылы 8 көппәтерлі тұрғын үйдегі 358 пә­­тер ел игілігіне берілді. Оның ішінде 4 жалдамалы үй­де – 108 пәтер, 4 несиелік үйде  250 пәтер бар. Әлеу­­мет­тік осал санаттағы тұрғындарды баспа­на­мен қамту үшін тағы 756 тұрғын үй сатып алынған. Бір қарағанда, қарапайым сандар болып көрінгенімен, осы цифрлардың әрқайсысының артында өз үйін он­да­ған жыл бойы күткен, балаларының бола­ша­ғын ойлаған, баспанаға қол жеткізуді армандаған адам­­дар тұрғаны айдан анық.

Өңірде тұрғын үй құрылысы биыл да жалғасып ж­атыр. Мәселен, тек биылғы жылдың алғашқы алты айын­да облыста 274,4 мың шаршы метр тұрғын үй пай­­­­далануға берілді. Осы кезеңде 2 мыңға жуық от­басы тұрғын үй жағдайын жақсартуға мүмкіндік алды. Жыл соңына дейін өңірде кемінде 1 200 пәтер салу жоспарланыпты. 

Өңірде реновация бағдарламасы аясында 8 көп­пәтерлі тұрғын үй салынып, пайдалануға берілген. Олар­дағы пәтер саны – 680. Сонымен қатар 21 ескі тұр­ғын үй бұзылып, олардың орнында жаңа құры­лыс­қа мүмкіндік жасалды. Бұл – шаһарда ондаған жыл бойы апаттық жағдайға жетіп құлауға шақ қалған үй­лерді сүріп жаңартудың ғана емес, адамдарға қауіп­сіз әрі жайлы өмір сүру ортасын қалып­тас­тыру­дың нақты көрінісі екені сөзсіз. Жалпы, ресми де­рек­тер бойынша кейінгі екі жылда Көкшетау, Бұлан­ды, Бурабай және Аршалы аудандарында 23 ескі тұр­ғын үй сүріліп, тұрғындарды көшіру үшін 763 пә­тер­лі 10 көпқабатты үй салынғаны көрсетілген. Нәти­же­сінде 248 отбасы жаңа баспанаға көшсе, тағы 73 мен­шік иесіне өтемақы төленген.

– Ақмола облысында реновация бағдарламасы 2024 жылдың қарашасында басталды. Қазірдің өзінде 23 ескі әрі тозығы жеткен ғимарат сүріліп, олардың ор­нына 763 пәтерлі 10 жаңа тұрғын үй кешені са­лын­ды. Нәтижесінде 248 ескі үйдің меншік иесі жаңа пә­тер­мен қамтамасыз етілді. Биыл тағы 11 жоба жүзе­ге асырылып, шамамен 70 ескі үй сүріледі. Оның ор­нына 1 200 пәтерлік жаңа тұрғын үй салу жоспар­лан­ған, – дейді KOKSHE ӘКК басқарма төрағасының орын­басары Әли Әлиев.

Ақмола облысындағы тұрғын үй құрылысының бү­гінгі қарқыны бір ғана санмен өлшенбейді. 2 мил­лион шаршы метрден астам жаңа баспана мыңдаған отбасы үшін жаңа мүмкіндіктің басталуына жол аша­тыны айқын. Бұл орайда 703 мың шаршы метр – 2025 жылғы рекордтық көрсеткіштердің бірі болса, 2026 жылдың алғашқы алты айының нәтижесі 274,4 мың шаршы метрге жетіп отыр.

Абзал АЛПЫСБАЙҰЛЫ, 

Ақмола облысы