Неге бұл туралы айтпайсыздар? шенеунік азық түлік бағасы туралы дауласты

Ұлттық экономика бірінші вице-министрі Азамат Әмрин азық-түлік бағасының өсуін тек ҚҚС мөлшерлемесінің көтерілуімен тікелей байланыстыруға болмайтынын мәлімдеді. Сонымен қатар, оның айтуынша, кейбір тауарлардың бағасы, керісінше, төмендеп жатыр, - деп хабарлайды Tengrinews.kz.

Ұлттық экономика бірінші вице-министрі Азамат Әмрин азық-түлік бағасының өсуін тек ҚҚС мөлшерлемесінің көтерілуімен тікелей байланыстыруға болмайтынын мәлімдеді. Сонымен қатар, оның айтуынша, кейбір тауарлардың бағасы, керісінше, төмендеп жатыр, - деп хабарлайды Tengrinews.kz.

Мәжіліс кулуарында Әмриннен азық-түлік бағасының өсуі және оның ҚҚС-тың көтерілуімен байланысы туралы сұралды. Шенеунік өнімдер тек қымбаттап жатыр деген пікірмен келіспеді.

"Мәселен, қазір қызанақ, қырыққабат пен қарақұмық бағасы арзандап жатыр. Неге бұл туралы айтпайсыздар? Бәрі қымбаттап жатыр деу шындыққа жанаспайды", - деп жауап берді ол.

Бірінші вице-министрдің сөзінше, мемлекет әлеуметтік маңызы бар тауарлар бойынша тиісті шаралар қабылдап жатыр. Сондай-ақ ол Қазақстандағы жалпы инфляция деңгейі төмендеп келе жатқанын хабарлады.

"Былтырғы қыркүйекте ең жоғарғы көрсеткіш 12,6 пайыз болды. Қазір ай сайын төмендеп келеді. Сәуірдің қорытындысы бойынша инфляция 10,6 пайыз болды. Мамырда одан әрі төмендейді деп күтуеміз. Биыл инфляция көрсеткіші бір таңбалы санға жетеді деп ойлаймын", - деді Әмрин.

Журналистер шенеуніктен отбасылық шығындары туралы да сұрады.

"Карточка әйелімде. Мен үй шаруасымен айналыспаймын, оған жұбайым жауапты. Менің бүкіл жалақым - отбасы бюджеті", - деп жауап берді бірінші вице-министр.

Ұлттық статистика бюросы мәліметінше, 2026 жылдың сәуірінде Қазақстандағы жылдық инфляция 10,6 пайыз болған. Бір жыл ішінде азық-түлік тауарлары 11,3 пайызға, азық-түлік емес тауарлар 11,7 пайызға, ал ақылы қызметтер 8,9 пайызға қымбаттаған. Бұл ретте бір ай ішінде өнім бағасы 0,7 пайызға өсті.

Еске сала кетейік: 2026 жылғы 1 қаңтардан бастап ҚҚС мөлшерлемесі 16 пайызға дейін көтерілді. Үкімет ҚҚС-тың өсуі бағаның күрт қымбаттауына себеп болмауы тиіс екенін, ал салықтың инфляцияға әсері 2–3 пайыз деңгейінде бағаланатынын мәлімдеген болатын.