Нью Делидегі көлік жарылысы теракт ретінде тергелуде

Үндістанның құқық қорғау органдары Нью-Делидегі тарихи Қызыл форт маңында орын алған көлік жарылысын террористік акт ретінде қарастырып, тергеу жүргізіп жатыр. Жарылыс салдарынан кемінде сегіз адам қаза тауып, 19-дан астам адам жарақат алған, деп хабарлайды Евронью́с.

Іс Үндістанның терроризмге қарсы негізгі заңы — Заңсыз әрекеттердің алдын алу туралы заң аясында тергелуде. Бұл заң тергеушілерге күдіктілерді ұстау бойынша кең өкілеттіктер береді.

Ішкі істер министрі Амит Шахтың мәлімдеуінше, жарылыс дүйсенбі күні кешкі сағат жетіге жуық, бағдаршамда тұрған Hyundai i20 маркалы көлікте болған. Жарылыс бірнеше көлік пен рикшаны шарпыған өртке себеп болды.

Оқиғадан кейін Нью-Делидің халықаралық әуежайында, метро станцияларында және мемлекеттік мекемелерде қауіпсіздік шаралары күшейтілді.

Премьер-министр Нарендра Моди бұл оқиғаға қатысты тергеу толық жүргізілетінін айтып, «қастандық жасағандар жазасыз қалмайды» деп мәлімдеді.

Қызыл форт — Үндістанның тәуелсіздік күніне арналған ресми шаралар өтетін, туристер көп келетін тарихи нысан. Ол парламенттен алты шақырым жерде орналасқан.

Қазіргі таңда жарылыс себептерін анықтау үшін сарапшылар жұмыс істеуде, ал бейнебақылау жазбалары тергеудің негізгі бөлігіне айналмақ.

Бүгін, 17:53