ОА мемлекеттері мен Корея парламенті спикерлерінің кездесуі өтті

Бүгін Ташкентте Орталық Азия мемлекеттері мен Корея Республикасының Парламенті спикерлерінің үшінші кездесуі өтті.

Келелі кеңеске Мәжіліс төрағасы Ерлан Қошанов бастаған Қазақстан Парламентінің делегациясы қатысты. 2023 жылдан бері дәстүрлі түрде өткізіліп келе жатқан іс-шара парламентаралық диалог пен Орталық Азия елдері арасындағы өзара іс-әрекетті нығайтудың тиімді алаңына айналып отыр.

«Адами қадір-қасиет, әлеуметтік әділдік пен қоршаған ортаны қорғау  жолындағы ынтымақтастық» тақырыбында өткен пленарлық сессияда сөз сөйлеген Мәжіліс төрағасы күн тәртібінің өзектілігін ерекше атап өтті. Айтуынша, адами қадір-қасиет, әлеуметтік әділдік пен қоршаған ортаны қорғау мәселесі елімізде іске асып жатқан реформалармен толық үндесіп жатыр. 

Ерлан Қошанов, ҚР Парламенті Мәжілісінің Төрағасы:

- Президент Қасым-Жомарт Тоқаевтың әр бастамасының негізінде осы мызғымас  принциптер тұр. Әділеттілік идеясы ұлттық идеологиямызға айналды. Өз  кезегінде бұл қағидалар аймағымыздағы, тіпті әлемдегі тұрақты даму мен  қауіпсіздіктің кепілі. Сондықтан бұл кездесу «Орталық Азия – Корея  Республикасы» форумының күн тәртібін жаңа маңызды бағыттарымен кеңейте  түсті.

Қазақстан мен Корея Республикасы арасындағы қарым-қатынастар жылдан жылға нығайып келеді. Мысал ретінде Қызылорда қаласында ашылған Сеул ұлттық ғылым және технология университетінің Жасанды  интеллект институты мен Түркістан қаласында ашылған Усонг университетінің филиалын айтуға болады. Ол тұтас Орталық Азия жастары үшін жаңа мүмкіндіктерге жол ашып отыр.

Айгүл Құспан, ҚР Парламенті Мәжілісінің депутаты:

- Тағы бір айта кететін жәйт - бұл мына Орталық Азия форматы 15 шақты елмен бар. Бірақ Парламенттік форум тек қана осы Кореямен. Ал президенттердің деңгейінде, министрлер арасында баяғыдан дамып келе жатыр. 

Форум аясында Ерлан Қошанов Корея Республикасы Ұлттық  Ассамблеясының төрағасы У Вон Шикпен кездесіп парламентаралық ынтымақтастық мәселелерін талқылады. Ал Орталық Азия мемлекеттері және Корея Республикасының парламент спикерлерінің төртінші кездесуін 2026 жылы Қазақстанда өткізу жоспарланып  отыр.

Дулат Нуркин