Корея сарапшылары Қазақстанның дамуын атап өтті

Сеул қаласында Оңтүстік Корея сарапшылары Қазақстан Республикасы күніне арналған дөңгелек үстелде еліміздің дамуын сөз етті. 

Дипломаттар, ғалымдар, қоғам қайраткерлері, журналистер мен бизнес өкілдері қазақ-корей қатынастарының едәуір нығайғанын атап өтті. Сеулдегі елшіміз Нұрғали Арыстановтың айтуынша, Оңтүстік Корея – Қазақстан үшін  Ресей мен Нидерландтан кейінгі орындағы үшінші ірі инвестор. Дипломаттың айтуынша, елімізде оңтүстік кореялық қаржы ұйымдары, автоконцерндер және техника өндіруші ірі  компаниялар табысты жұмыс істеп келеді. Ал биыл Қазақстанда жаңа бірлескен жобалар іске қосылды. Олар Қостанайдағы автомобиль зауыты, Алматыдағы медициналық орталық және тұрмыстық техника өндірісі. Сонымен қатар екі ел арасындағы әуе рейстерінің саны жыл сайын артып келеді.

Нұрғали Арыстанов, ҚР Корея Республикасындағы Елшісі:

- Әр апта сайын Астана, Алматы, Шымкент және Пусан мен Сеул қалалары арасында 20 әуе рейсі орындалады. Бұл бағыттарда бірнеше авиакомпания қызмет көрсетеді. Биылғы жылдың алғашқы жартысында Кореядан Қазақстанға келген азаматтардың саны 30 пайызға өсіп, 17 202 адамға жетті. Ал Қазақстаннан Кореяға барғандар саны 20 пайызға артты - 37 737 адам.  Мұндай өсім 30 күндік визасыз режимнің арқасында мүмкін болды.

Ким Дэ Сик, Корея Республикасының Қазақстандағы бұрынғы елшісі:

- Президент Тоқаев қазақстандық қоғамды жаңғырту мен оған демократиялық элементтер енгізу ісінде үлкен жетістіктерге жетіп жатқандай көрінеді. Екі ел арасындағы қатынастар менің дипломатиялық қызмет атқарған кезеңіммен салыстырғанда әлдеқайда жақсы дамып келе жатқаны қуантады.