Жаңа құрылыстар тұрғын үй бағасының өсуіне әкеп соқпауы тиіс: министрдің мәлімдемесі

Ауқымды құрылыс жұмыстары тұрғын үй мен құрылыс материалдары бағасының өсуіне әкеп соқпауы тиіс. Бұл туралы Үкіметте өткен брифингте өнеркәсіп және құрылыс министрі Ерсайын Нағаспаев мәлімдеді, деп хабарлайды Tengri Home тілшісі.

Поделиться

Бұл ретте шенеунік жеке сектордағы баспана құны нарық пен сұранысқа байланысты екенін, ал әлеуметтік тұрғын үй бағасын мемлекет реттейтінін нақтылады - сметалық құнның орташа ірілендірілген көрсеткіші шаршы метріне 335 мың теңге. Бұл сан құрылыстың есептік құнына қатысты және нарықтағы пәтерлердің бағасы дәл осындай болады дегенді білдірмейді.

Сондай-ақ Нағаспаев биыл елімізде 24 миллион шаршы метр тұрғын үй салу жоспарланып отырғанын айтты.

Министр жоғары сұранысты кезекте тұрғандардың көптігімен де түсіндірді. Оның айтуынша, инвентаризациядан кейін Отбасы банк тізімінде 870 мың адам тұр.

"Біз барлығын бірден баспанамен қамту үшін соншама үйді бір уақытта сала алмаймыз", - деген ол, пәтер сатып алу үшін қолжетімді несие қажет екенін атап өтті.

Ипотекалық бағдарламалардағы қаражат тапшылығы туралы сұраққа жауап бере отырып, Нағаспаев қаражат транштармен бөлінетінін, оның көлемі әзірге жеткіліксіз екенін, бірақ қаржыландыруды ұлғайту жоспарланғанын жеткізді.

Министр құрылыс материалдарының басым бөлігі Қазақстанда өндірілетінін, сондықтан олардың бағасы күрт өседі деп күтпейтінін айтты.

Президент Қасым-Жомарт Тоқаев Қазақстан халқына Жолдауында 2027 жылды Жалпыхалықтық ауқымды құрылыс жылы деп жариялауды ұсынды. 2029 жылдың аяғына дейін әлеуметтік, көлік және инженерлік жобаларға Ұлттық қордан шамамен 6,5 триллион теңге бөлу жоспарланып отыр.

Бұл ретте тұрғын үйге жоғары сұранысты "Ұмай" ипотекасына қатысты жағдай да растайды: 20 миллиард теңге көлеміндегі екінші транш бағдарлама іске қосылған күні, 3 қарашада таусылып қалды.

Бізді Google-дың негізгі дереккөздер тізіміне қосыңыз

Ипотека тұрғын үй Отбасы банк қымбаттау баспана