Трамп жанармай бағасының өсуіне не себеп болғанын айтты

АСТАНА, 6 қазан – Sputnik. АҚШ президенті Дональд Трамп Ресейдің мұнай нысандарына жасалып жатқан Украина шабуылдарына байланысты жағдайды талқылап жатқанын мәлімдеді. Оның айтуынша, бұл шабуылдар үлкен қиындықтар туғызып отыр, деп хабарлады РИА Новости.

"Біз бұл туралы сөйлесіп жатырмыз. Меніңше, шабуыл бәсеңдеп келеді. Ол көптеген проблема туғызып отыр", - деді Трамп журналистерге.

Алайда Америка басшысы кіммен және қандай мәселелер бойынша келіссөз жүргізіп жатқанын нақтылаған жоқ.

Трамп өз жазбасында АҚШ-тағы жанармай бағасының өсуіне Ормуз бұғазындағы жағдай емес, Киевтің Ресей мұнай өңдеу зауыттарына жасаған соққылары және АҚШ-тың бірқатар штатындағы мұнай өңдеу зауыттарының жабылуы себеп болып отырғанын айтты.

Ресей президентінің баспасөз хатшысы Дмитрий Песков Украина Ресейдің бейбіт экономика нысандарына жасаған шабуылдары үшін жауап беруге тиіс екенін мәлімдеді. Оның айтуынша, Ресей Қарулы күштері қазір жауап ретінде тиісті шаралар қабылдап жатыр.

Ресей Қорғаныс министрлігі бұған дейін Украина президенті Владимир Зеленскийдің Ресейдегі мұнай өңдеу зауыттарына жасалатын шабуыл күшейтілетіні туралы мәлімдемесін естігенін хабарлаған. Ведомство Зеленскийдің осы мәлімдемесінен кейін Украинаның әскери нысандарына, әскери-өнеркәсіп кешені объектілеріне және олармен байланысты инфрақұрылымға жасалатын соққылар күшейтілетінін атап өтті.