ЮНИСЕФ басшысы Қазақстанның бала денсаулығы саласындағы көшбасшылығын атап өтті

Кездесу барысында тараптар екіжақты ынтымақтастықтың қазіргі жағдайы мен перспективаларын, сондай-ақ Қазақстандағы балалар мен жасөспірімдердің денсаулығы мен әл-ауқатын нығайтуға бағытталған бірлескен бастамаларды іске асыру мәселелерін талқылады.

Министр балалар мен отбасыларға көрсетілетін медициналық-санитариялық алғашқы көмекті жетілдіруде ұйымның қолдауының маңыздылығын атап өтіп, патронаждық бақылаудың әмбебап-прогрессивті моделін дамытуға ЮНИСЕФ-тің қосқан елеулі үлесін ерекше атап өтті.

ҚР Денсаулық сақтау министрлігі мәліметінше, Қазақстан балалар өлімнің негізгі көрсеткіштері бойынша Орталық Азия өңірінде жетекші орындардың бірін иеленіп отыр. Бұл ретте көрші елдермен салыстырғандағы айырмашылық 1,5–3 есе. Бұл денсаулық сақтау жүйесінің даму деңгейіндегі, медициналық көмектің қолжетімділігі мен ресурстық қамтамасыз етудегі айырмашылықтарға байланысты.
ЮНИСЕФ, БҰҰ, ДДҰ, IGME және Дүниежүзілік банк тобының бірлескен баяндамасына сәйкес 2024 жылы Қазақстан Республикасында неонаталдық өлім көрсеткіші 3,9% болды. Бұл Орталық Азия елдері арасындағы ең төменгі көрсеткіш болып саналады. Дамыған елдермен салыстырғанда, бұл көрсеткіш іс жүзінде Америка Құрама Штаттарының деңгейімен (3,7) теңесті.

– Қол жеткізген жетістіктеріңізбен құттықтаймын. Балалар мүддесі жолындағы жұмыс табандылықты, жүйелі тәсілді және тұрақты назарды талап етеді, сіздерде бұл үшін қажетті күш-жігер бар. Халқы шашыраңқы орналасқан үлкен елде ана өлімін төмендету – өте күрделі міндет. Сіздердің тәжірибелеріңіз бірегей, өйткені ол тек қомақты ресурстарды ғана емес, медициналық қызметтердің қолжетімділігін қамтамасыз ету үшін инновациялық шешімдерді енгізуді талап етеді. Сіздерде халықаралық деңгейде бөлісуге болатын құнды тәжірибе бар, – деп атап өтті ЮНИСЕФ өкілдігінің басшысы.

Кездесу шеңберінде әрі қарайғы өзара іс-қимылдың басым бағыттары, соның ішінде ерте шақтағы балаларды дамыту, психикалық денсаулықты нығайту, балалардың құқықтарын қорғау, сондай-ақ балалар мен жастардың өмір сапасын жақсартуға бағытталған ақпарат пен қызметтерге қолжетімділікті кеңейту мәселелері талқыланды.

Сондай-ақ 2026–2030 жылдарға арналған ЮНИСЕФ-тің Қазақстандағы жаңа Елдік бағдарламасы шеңберіндегі ынтымақтастық перспективаларына ерекше назар аударылды. Бұл бағдарлама балалардың денсаулығы мен әл-ауқаты саласында бірлескен жобаларды іске асыруға қосымша мүмкіндіктер ашады.
Кездесу қорытындысы бойынша тараптар әріптестікті одан әрі нығайтуға дайын екенін растады. Ынтымақтастықтың басым бағыттары ретінде педиатриялық көмектің сапасы мен қолжетімділігін арттыру, ерте даму және ерте араласу жүйесін дамыту, балалардың арасындағы семіздіктің профилактикасы шараларын іске асыру, сондай-ақ балалардың санитариялық-эпидемиологиялық әл-ауқатын қамтамасыз ету айқындалды.

Қазақстанда патронаждық қызметті дамытудың арқасында үйде балалардың өлімі 22 пайыз төмендегенін жазған болатынбыз.