Олжас Бектенов Семей орманында ЖИ негізіндегі өртті ерте анықтау жүйесін тексерді

Qazaq24.com, Egemen.KZ дереккөзінен алынған ақпаратқа сүйене отырып мәлімет бөліседі..

Абай облысына жұмыс сапарымен барған Премьер-министр Олжас Бектенов Мемлекет басшысы Қасым-Жомарт Тоқаевтың ормандарды қорғау және сақтау ісінде заманауи цифрлық технологияларды енгізу жөніндегі тапсырмаларының орындалу барысын тексерді. Осы мақсатта ол «Семей орманы» мемлекеттік орман табиғи резерватында болып, өртті ерте анықтауға арналған жүйелердің дайындығына ерекше назар аударды, деп хабарлайды Egemen.kz.

Фото: primeminister.kz

Цифрлық шешімдер – орман қауіпсіздігінің негізі

Резерват аумағында орман және дала өрттерін ЖИ негізінде ерте анықтау жүйесінің пилоттық енгізілуі таныстырылды. Бұл технология өрт ошақтарын алыс қашықтықтан және кез келген ауа райында анықтауға мүмкіндік береді.

Осы жерде Премьер-министрдің, экология және табиғи ресурстар министрі Ерлан Нысанбаевтың, Төтенше жағдайлар министрі Шыңғыс Әріновтің және Абай облысының әкімі Берік Уәлидің қатысуымен орман өртін қолдан ұйымдастырған оқу-жаттығу өткізілді. Мамандар цифрлық жүйелердің өрт сөндіру қызметімен өзара әрекеттесуін көрсетті.

Экология және табиғи ресурстар вице-министрі Нұрлан Құрмалаевтың айтуынша, заманауи тепловизиялық және оптикалық камералармен жабдықталған бейнемониторинг жүйесі өрт белгілерін бастапқы кезеңде-ақ автоматты түрде анықтайды. Түтін немесе жалын тіркелген жағдайда, жүйе дереу Жедел басқару орталығына сигнал жібереді. Бұл өртті жылдам оқшаулап, жоюға мүмкіндік береді.

Жедел басқару орталығы бейне қабырғамен және стационарлық радиостансамен жабдықталған. Мұндай орталықтар Абай облысындағы 7 ауданда орналасқан «Семей орманының» барлық 10 филиалында жұмыс істейді. Жүйе 100-ден астам сынақтан өткен.

Қазіргі уақытта жүйені жетілдіру жұмыстары жалғасып жатыр. Атап айтқанда, ол алты метеокешенмен және найзағай бағытын анықтау стансасымен интеграцияланбақ, бұл құрғақ найзағайдан туындайтын өрттерді де ерте анықтауға мүмкіндік береді.

Президент тапсырмасына сәйкес, өртті ерте анықтау технологиясы бүкіл ел бойынша кезең-кезеңімен кеңейтіліп жатыр. Бұл жөнінде «Қазақтелеком» АҚ цифрлық бизнес дивизионының бас директоры Бақтияр Қожахметов баяндады. Оның айтуынша, Ақмола облысында, Астана маңында және бірқатар ұлттық парктерде жүйе кезең-кезеңімен енгізілуде. Ал биыл шілдеге дейін еліміздегі 24 табиғи парк пен қорық толық қамтылып, қыркүйекте жүйе өнеркәсіптік пайдалануға беріледі.

«Семей орманы» резерватында сирек кездесетін сілеусін көзге түсті

Материалдық-техникалық база нығайып келеді

Олжас Бектенов орманды қорғауда жаңа стандарттар енгізіліп жатқанын атап өтті.

«Мемлекет басшысының тапсырмаларына сәйкес біз орман қорын қорғаудың түбегейлі жаңа стандарттарын енгізіп жатырмыз. Орманды қалпына келтіріп қана қоймай, төтенше жағдайлардың алдын алуға да бағытталған жүйелі шаралар қабылданып отыр. Президент айқындаған негізгі бағыттардың бірі – цифрландыруды енгізу. Өткен жылы резерватта 510 мың гектар аумақты қамтитын, 37 заманауи камерамен жабдықталған өртті ерте анықтау жүйесі енгізілді. Технологияларды тікелей патрульдеу шараларымен нығайту қажет. Бұл өте маңызды. Сондықтан өрт қаупі жоғары кезеңде орман күзетінің тұрақты жұмысын қамтамасыз етіп, ол барлық қауіпті аймақтарды қамтуға тиіс. Жүргізіліп жатқан жұмыс «Таза Қазақстан» жалпыұлттық бастамасының мақсат-міндеттеріне толық сәйкес келеді, оның шеңберінде біз табиғи ресурстарды сақтап қана қоймай, азаматтардың экологиялық мәдениетін де арттырамыз», деді Олжас Бектенов.

Премьер-министр жұмысты жеделдетіп, цифрлық технологияларды сапалы енгізуді қамтамасыз етуді тапсырды.

Краснокордон орманшылығында Олжас Бектенов орман шаруашылықтарының техникалық жаңғыртылуымен танысты. «Семей орманы» МОТР бас директоры Қазбек Әметовтің айтуынша, соңғы екі жылда резерваттың техникалық паркі 100% жаңартылған.

Бұрын тозу деңгейі 85% болса, бүгінде бұл мәселе толық шешілген. Тек 2023 жылдың өзінде лизинг арқылы 39 өрт сөндіру машинасы, 26 шағын кешен және 10 трактор алынған.

Кәсіпорынның иелігінде:

30 орман өрт стансасы; «Қазавиаорманқорғау» РМҚК-ның 3 тікұшағы; 82 өрт сөндіру автомобилі; 49 патрульдік кешен; 187 трактор және өзге де техника бар.

Ел бойынша ауқымды жаңғырту

Үкіметтің өртке қарсы техниканы жаңарту бағдарламасы шеңберінде 2024-2025 жылдары 21,5 млрд теңге бөлінді. Соның нәтижесінде орман шаруашылықтарының техникамен қамтылуы 87%-ға жетті.

Осы кезеңде:

92 өрт сөндіру машинасы; 118 патрульдік кешен; 244 трактор; 240 патрульдік көлік; 3 мыңнан астам басқа техника сатып алынды.

Сонымен қатар лизинг арқылы 1057 өртке қарсы техниканы алу үшін 35 млрд теңге бағытталған. Бұл жұмыстарды биыл мамыр айының соңына дейін толық аяқтау жоспарланып отыр.

Премьер-министр Олжас Бектенов атап өткендей, цифрландыру, материалдық базаны нығайту және жүйелі басқару – орман қауіпсіздігін қамтамасыз етудің негізгі тетігі. Мемлекет қолға алған шаралар табиғи ресурстарды сақтаумен қатар, экологиялық қауіпсіздікті күшейтуге бағытталған.