Оңтүстік Кореядағы кәсіпорындағы өрттен соң қазақстандық азамат табылмай жатыр

Еліміздің Сыртқы істер министрлігі Оңтүстік Кореядағы зауытта болған өрттен кейін Қазақстан азаматының жоғалып кетуіне қатысты пікір білдірді, – деп хабарлайды Aikyn.kz сайты. 

Ведомство аталған жағдайды растады.

«30 қаңтар күні Оңтүстік Корея Республикасының Мэндон-мён қаласында азық-түлік пен сусын өндіретін кәсіпорында өрт шықты. Оқиғадан кейін 81 қызметкер эвакуацияланды. Алайда екі жұмысшының, оның ішінде Қазақстан азаматының қайда екені белгісіз болып отыр. Полиция мен өрт сөндіру қызметінің мәліметінше, 31 қаңтар күні таңертең өртенген цех ішінен жеке басы анықталмаған мәйіт табылды. Марқұмның кім екенін анықтау үшін полиция Ұлттық ғылыми-зерттеу институтына жүгінді», – деп мәлімдеді министрліктің баспасөз қызметі.

Қазіргі уақытта жоғалған азаматты анықтау жұмыстары жалғасып жатыр.

«Қазақстанның Оңтүстік Кореядағы елшілігі полициямен, өрт сөндіру қызметімен және жоғалған азаматтың туыстарымен тұрақты байланыста. Аталған мәселе дипломатиялық өкілдіктің бақылауында», – делінген хабарламада.