Оралда жалдамалы пәтер иелері 16,3 млн астам теңге қарыздар болып отыр

Орал қаласы тұрғын үй-коммуналдық шаруашылығы, жолаушылар көлігі және автомобиль жолдары бөлімінің басшысы Асылжан Хайруллиннің мәлім еткеніндей, жалдамалы пәтер иелерінің бәрі бірдей келісімшартқа сәйкес міндеттемелерін орындай бермейді. 

Бөлім басшысының сөзіне қарағанда, 590 пәтер иесінің 3 айдан астам қарызы бар. Бұл барлық жалдамалы пәтерлердің 40 пайызынан асады. Қазіргі кезде жалпы қарыз көлемі 16 млн 387,090 мың теңгеге жетті.

— Ай сайын жалға берілген үйлер қаржысын жинау және оны мақсатына сәйкес пайдалану бойынша мониторинг жүргізіледі. «Тұрғын үй қатынастары орталығы» коммуналдық мемлекеттік мекемесінің мамандары мекенжайларға барып, берешекті өтеу жөнінде хабарлама табыс етеді, — дейді А.Хайруллин.

Оның айтуынша, «Тұрғын үй қатынастары орталығы» КММ бірқатар шара қабылдады. Атап айтқанда, М.Мөңкеұлы 85/6 және Қамбар батыр көшесі 6-үйде тұратын екі тұрғын сот шешімімен жалдамалы пәтерінен шығарылды. Сондай-ақ 11 жалға алушыға ресми хабарлама жіберілді. Соның ішінде 9-ының қарызы 6 айдан асқан. Біреуі уақытылы төлемеумен бірге тұрғын үйде тұру ережесін үнемі бұзған. Тағы біреуі өзі тұруы тиісті пәтерді басқа біреуге жалға беріп, 6 айдан астам уақыт бойы жалға алу ақысын төлемеген.

Еске сала кетейік, бұдан бұрын Оралда апатты үйі сүрілген тұрғындар неліктен баспана ала алмай отырғанын жазған болатынбыз.