Өртенген пауэрбанк Lufthansa ұшағын шұғыл қондыруға мәжбүр етті

Франкфурттан Лиссабонға бағыт алған Lufthansa ұшағында пауэрбанк тұтанып, салдарынан пилот бағытын өзгертіп, Францияның Лион қаласына қонуға мәжбүр болды, деп хабарлайды Tengri Travel.

БАҚ мәліметінше, оқиға өткен сенбіде Lufthansa әуекомпаниясының Франкфурт (Германия) – Лиссабон (Португалия) рейсі кезінде болған. Бортта 198 жолаушы болды. БАҚ дереккөзіне сүйенсек, жолаушылардың бірінің портативті зарядтау құрылғысының аккумуляторы өртенген.

Анықтама: Power bank (пауэрбанк) - бұл смартфондар, планшеттер, ноутбуктер мен камералар сияқты өзге де электронды гаджеттерді қуаттандыруға арналған портативті қайта зарядталатын құрылғы.

Экипаж мүшелері аккумуляторды бірден литий батареяларына арналған арнайы қорғаныс пакетіне салғаны нақтыланды. Жолаушылар мен экипаж мүшелерінен ешкім зардап шеккен жоқ.

Ndtv хабарлауынша, сақтық шарасы ретінде пилот бағытты өзгертіп, Лионға қону туралы шешім қабылдаған. Ұшақ аман-есен қонды.

Қонақүйде түнеген жолаушылар жексенбі күні сапарларын жалғастырды.

БАҚ мәліметінше, қаңтардан бастап Lufthansa өз ұшақтарының бортында сыртқы аккумуляторларды пайдалануға және зарядтауға тыйым салған. Бұл ретте жолаушыларға қауіпсіздік талаптары сақталған жағдайда салон ішінде екі пауэрбанкке дейін алып жүруге рұқсат етіледі. Барлық ережемен әуекомпаниясының сайтында танысуға болады.

Әуекомпанияларының ескертуі

Еске сала кетейік, әуекомпаниялары пауэрбанктерді тасымалдау ережелерін 2025 жылдан бастап күшейте бастады. Соның ішінде, 2025 жылғы 13 наурыздан бастап Air Astana және FlyArystan әуекомпанияларында белгілі бір талаптар қолданысқа енді.

Қосалқы литий батареяларын, соның ішінде пауэрбанктер мен электронды темекілерді тек қол жүгімен тасымалдауға болады. Егер қол жүгін багажға тапсыруды сұраса, жолаушы оның ішіндегі барлық қосалқы батареяларды алдын ала шығарып алуы тиіс.

Ережелер аккумулятордың қуаттылығына байланысты:

100 ватт-сағатқа дейін – шектеусіз тасымалдауға рұқсат етіледі, бірақ тек қол жүгінде; 100-ден 160 ватт-сағатқа дейін – тек әуекомпаниясының алдын ала мақұлдауымен ғана рұқсат етіледі (бір жолаушыға екіден көп емес батарея); 160 ватт-сағаттан жоғары – тасымалдауға тыйым салынады.

Сонымен қатар ұшу кезінде жолаушыларға құрылғыларды пауэрбанктен зарядтауға тыйым салынады. Сондай-ақ портативті зарядтау құрылғыларын борттағы розеткаларға қосуға болмайды.

Бізді Google-дың негізгі дереккөздер тізіміне қосыңыз

Қосу