Өскеменде облыс әкімінің орынбасарына қатысты сот басталды

Өскеменде Шығыс Қазақстан облысы әкімінің орынбасары Жақсылық Омарға қатысты сот процесі басталды.

Ол ақпан айында ұсталған болатын, тергеумен Ұлттық қауіпсіздік комитеті жанындағы Сыбайлас жемқорлыққа қарсы қызмет айналысты.

Іс Өскемен қаласының қылмыстық істер жөніндегі ауданаралық сотында ашық режимде және қысқартылған тәртіппен қаралып жатыр.

Сотталушы процесс аяқталғанға дейін қамауда қалады. Сот бұлтартпау шарасын өзгертуге негіз таппады:
«Сотталушыға қатысты "күзетпен ұстау" бұлтартпау шарасы өзгеріссіз қалдырылсын, мерзімі сот істі қарап біткенге дейін ұзартылсын», – делінген судья қаулысында.

Жақсылық Омарға Қылмыстық кодекстің екі бабы бойынша айып тағылып отыр:

- 190-бап, 3-бөлім – алаяқтық (алдау немесе сенімді теріс пайдалану арқылы бөтеннің мүлкін жымқыру);

- 366-бап, 3-бөлім – ірі көлемде пара алу (лауазымдық өкілеттігін пайдаланумен байланысты сыбайлас жемқорлық қылмысы).