Өскеменде трамвай жетіспейді

Күн сайын жолаушы тасымалдауы тиіс 19 қоғамдық көліктің орнына қазір оншақтысы ғана жолға шығады. 

Олардың өзі де әбден ескіріп, қақаған қыста жылымайтын жағдайға жеткен. Техникадан бөлек электр желілері мен темір жолы да 85 пайызға тозған.

Трамвай – өндірістік қаланың ажырамас бөлігіне айналған күре тамыры іспетті. Себебі аталған көлік жүйесі 65 жылдан бері жолаушыларды діттеген жеріне жеткізіп келеді. 

Михаил Чайка, жолаушы тасымалдаушы компанияның бас инженері:

- Трамвай Өскемен қаласына өте қажет. Бір вагонның өзі күніне мыңға тарта адам отырады. Егер біз күніне 12 вагон шығарсақ, демек 10 мың жолаушыны тасимыз.

Трамвайға жиі мінетіндердің бірі Алена Шутилина. Жасөспірім тұратын  «Құрылыс алаңы» ықшам ауданында автобус бармайды. Сондықтан мектепке барып қайту үшін ол шойын жолмен жүретін қоғамдық көлікті ғана пайдаланады. 

Алёна Шутилина, оқушы:

- Осы жолы трамвайды көп тосқан жоқпын тез келді. Кейде көп кешігеді. Сол кезде далада 30-40 минуттай тұрып қаламын. Кешкісін күн ерте батады. Ал қараңғыда жүру қорқынышты. 

Күн сайын қала көшелеріне 19 травмай шығуы керек. Қазір соның әрі кеткенде 12 ғана жүреді. Техниканың жетіспеушілігі әсіресе таңертең және кешкі уақыттарда анық байқалады. 

Юлия Андриевская, жүргізуші:

- Кешкісін трамвай жолаушыларға лық толады. Себебі бәрі үйіне қайтуға асығады. Сол кезде кейбір аялдамаларда тұрған кісілер  сыймай қалады.

Жолаушы тасымалына жауапты компанияда 25 вагон бар. Соның басым бөлігі ескі. Сондықтан жиі бұзылады. Көнерген көліктерге қосалқы бөлшек те тапшы. 

Азат Қасымов, қала әкімінің баспасөз хатшысы:

- Біз бұл жағдайдан хабардармыз. Жолаушы тасымалын жақсарту үшін былтыр 3 трамвай сатып алынды. Биыл тағы үшеуі алынады. Оған бюджеттен 1 млрд теңге бөлінді. Жыл сайын техникаларды жаңартып отырамыз.

Трамвай сатып алумен мәселе түбегейлі шешілмейді. Себебі шойын жол мен электр желілері де ескірген. Ал оларды жаңарту үшін кемінде 10 млрд теңге қажет, дейді мамандар. 

Шыңғыс Қалиден, Анель Есенбердина, Жігер Бабаханов