Отандық балға сұраныс жоғары

24.KZ парақшасынан алынған ақпаратқа сәйкес, Qazaq24.com хабарлайды..

Шымкенттік омарташылар бал экспортын ұлғайтады.

Қазір Ресей, Қытай және Өзбекстан елдерімен арада құжат рәсімделіп жатыр. Айта кетерлігі, өңірде бал өндірушілердің саны да артқан.

Өңір климаты омарта шаруашылығына өте қолайлы. Күн молынан түсіп, бал өндіруге қажетті өсімдіктердің өсу кезеңі ұзақ сақталады. Бұған дейін мемлекеттік субсидия тек селекциялық жұмыстарға берілсе, қазір өндірілген бал көлеміне қарай қолдау көрсетіледі. Бұл өзгеріс шаруашылықтарға жаңаша серпін сыйлады.

Осыған сәйкес жиналған ара балы бірге өңделіп, нарық талаптарына сәйкестендірілді. Заманауи технологиялар өнім сапасын жақсартуға мүмкіндік берді. Қазір өңірдегі отбасылық омарташыларды біріктірген шаруашылықта жылына 80 тонна өнім шығарылады.

Ирина Демидова, омарташы:

- Омарташылар өнімін өткізу үшін ресми келісімшарттарға ден қоя бастады. Енді ара балы дүкендер мен сауда желілеріне тікелей шығарылады. Жаңа бағдарлама тұтынушылар үшін тиімді.

Омарташылар өнім көлемін арттыру үшін ғылыми әдістерге иек артты. Аралардың жаңа буыны өсіріліп, балдың да сақталу мерзімі артқан. Өнімге де сұраныс жоғарылап келеді.

Роза Жұмақылышқызы, Ауыл шаруашылығы ғылымдарының кандидаты:

- 5 жылдық статистиканы қарасақ, біздің араларға сұраныс жыл сайын көбейіп жатыр. Мысалыға 20-30% өскен. Біз оны шетелге өз брендіміз сияқты таныстырғымыз келеді.

«Жергілікті шаруашылықтар жылына 320 тонна бал өндіреді. Субсидиялау бағдарламасы экспорттық әлеуетке оң әсер етуі тиіс», - дейді салаға жауаптылар. Қазір Ресей нарығынан бөлек, Қытай, Өзбекстан тарапымен келіссөздер жүріп жатыр.

Сағдат Маханов, қалалық Ауыл шаруашылығы және ветеринария басқармасының бөлім басшысы:

- Биылғы жылы 30 млн-ның үстінде субсидия қарастырылған. Егер жылдың соңына дейін өтініш саны артатын болса қосымша қаржы қаралатын болады. Қазіргі уақытта Өзбекстан, Қытай мемлекеттеріне де экспорттау бойынша жұмыстар атқарылып жатыр.

Соңғы жылдары шаруашылық саны екі есе артып, жалпы 18 мың ара ұясы тіркелді.

Авторлары: Нұрсұлтан Мұхамеджан, Нұрмахан Мұсатов, Нұрмахан Бекмұратов

Қосымша ақпарат пен соңғы жаңалықтар үшін Qazaq24.com сайтын бақылаңыз.