Отандық тауар өндірушілер реестрі: мемлекеттік қолдау қолжетімді болады

ҚР Өнеркәсіп және құрылыс министрлігі мен «Электрондық қаржы орталығы» АҚ бірлесіп, отандық тауар өндірушілерді қолдауға арналған мемлекеттік цифрлық сервис – ОТӨ Реестрін іске қосуға дайындық жүргізуде.

Реестрді енгізу арқылы адал жұмыс істейтін өндірушілер мемлекеттік қолдау шараларына қатыса алады, ал мемлекеттік сатып алуларда олардың өніміне басымдық беріледі. Соңғы жылдары отандық өнімнің сатып алынатын тізімі 2,7 есеге ұлғайып, 4,8 мыңнан астам атауды қамтып отыр.

Қосымша қолдау тетіктері де қарастырылған: мемлекеттік келісімшарт жасалған кезде өндірушіге 30% алдын ала төлем беріледі, шартты орындауды қамтамасыз ету міндеті жойылды, ал айыппұл мөлшері 10%-дан 3%-ға дейін азайтылды. Осы шаралардың нәтижесінде 2025 жылдың 9 айында отандық кәсіпорындармен жасалған келісімшарттар құны шамамен 400 млрд теңгеге жетті, бұл өткен жылдың көрсеткішінен 2 есе көп.

Сонымен қатар, офтейк-келісімшарттар арқылы тауар өндірушілердің өнімін сатып алу кепілдігі берілген. Биылғы 9 айда мұндай келісімдер құны 900 млрд теңгеге жетіп, былтырғы жылдық көрсеткіштен төрт есе асып түсті. Ұзақ мерзімді келісімшарттар да белсенді жасалып, 1,5 трлн теңгеге 1370 келісімшарт жасалған, бұл отандық кәсіпорындардың нарықтағы орнын нығайтуға және импортқа тәуелділікті азайтуға мүмкіндік береді.

Айдын Рақымжан, ҚР Өнеркәсіп және құрылыс министрлігінің департамент басшысы:

«ОТӨ Реестрі – отандық өндірушілерге мемлекеттік қолдауды тиімді етуге арналған маңызды құрал. Реестр өндірушілер мен олардың өндірістік қуаты туралы нақты ақпаратты біріктіріп, қолдау мен ынталандыру шараларының нәтижелілігін арттырады».

ОТӨ Реестрінің іске қосылуы қазақстандық өндірушілерге қолдауды бұрынғыдан да қолжетімді әрі тиімді етеді.

Бүгін, 14:55