Өзімді үйімдегідей сезіндім . Британиялық Қазақстанға алғаш рет келіп, өзін не таңғалдырғанын айтты

Қазақстан өзінің ерекше ландшафттарымен, ұлттық дәстүрлерімен және табиғат пен заманауи қала өмірінің үйлесімімен шетелдік саяхатшылардың назарын барған сайын көбірек аударып жатыр. Жақында елімізге Ұлыбританиядан Мэтт Барлоу есімді турист келді. Ол Маңғыстау мен Алматыда болып, Tengri Travel басылымына сапар кезінде өзін не таңғалдырғанын айтып берді.

Сапар бағыты қандай болды?

Мэтт Қазақстанға тамыз айында бөлесімен бірге келген. Бұған дейін олар Қырғызстанда болып, кейін көлікпен құрлық шекарасы арқылы өтіп, Маңғыстау облысына жол тартқан.

"Бөлем маған қоңырау шалып, Қырғызстан мен Қазақстанға бірге баруды ұсынды. Біз 5 күндік сапар аясында Қырғызстаннан Қазақстанға көлікпен өтіп, Маңғыстау облысының таңғажайып ландшафттарын зерттеуге басымдық бердік", - деді ол.

Кадрларға қарағанда, Мэтт Маңғыстауды джиппен аралап, Тұзбайыр, Бозжыра, Қарынжарық және басқа да басты көрікті жерлерде болған. Олар шатырларда түнеген.

Мэтттің Бозжыра маңындағы лагері. Фото: Instagram/@_mjbarz

Ал бір түні желдің қатты болғаны сонша, Мэттке шатыр ұшып кетпеуі үшін оны ұстап тұруға тура келген.

Instagram-дағы бұл жазбаны көру

A post shared by Dr Matt Barlow (@_mjbarz)

Саяхатшыны не таңғалдырды?

Сапар алдында Мэтт Қазақстан туралы тек жалпы мәліметтерді - көшпенділер мұрасы, кең байтақ аумағы, далалары мен шөлдері туралы ғана білетін. Оның айтуынша, бәрін өз көзімен көру мүлдем бөлек әсер қалдырған.

"Шекарадан өткен бойда бұл жерлерді өз көзіңмен көргенде, олар кез келген фотосуреттегіден әлдеқайда шексіз әрі айбынды көрінеді екен", - деді ол.

Алматыға келген Мэтт мегаполистің көп жағынан еуропалық қалаларға ұқсайтынын атап өтті.

"Кейінірек Алматыға келгенімізде, қаланың қаншалықты заманауи және ауқымды екеніне таңғалдым - өзінің энергиясы мен мәдениетінің арқасында кей жерлері Еуропаны қатты еске түсіреді", - деп ағынан жарылды Мэтт.

"Өзімді мұнда өз үйімдегідей сезіндім"

Мэттті қазақстандықтардың мәдени әртүрлілігі де жағымды таңғалдырды. Оның өзі жартылай ағылшын, жартылай ирландиялық және малай тамыры бар, сондықтан көпұлтты Қазақстанда ол бірден өзін жайлы сезінген.

"Жеке деңгейде мені ең қатты тебіренткені - бұл жердің маған қаншалықты жақын болып көрінуі. Менің тегім аралас (ағылшын, ирландиялық және малай), ал Қазақстан мәдениеттердің ерекше тоғысқан жері сияқты сезіледі. Дәстүрлердің осындай алуан түрлілігін көріп, өзімді мұнда өз үйімдегідей сезіндім", - деді Мэтт.

Британиялық азамат Алматының қалалық өмірі мен оның айналасындағы табиғаттың арасындағы айқын, бірақ оның пікірінше, үйлесімді контрастқа назар аударған.

Спортшылар, бокс және Головкин

Мэтттің өзі 15 жылдан бері спортпен белсенді айналысады: ауыр атлетика, калистеника және жүгіру. Бұрын футбол мен регби ойнаған. Оның айтуынша, қалада спортшыларды, әсіресе боксшыларды жиі кездестіруге болады.

"Қазақстанның аңызға айналған Геннадий Головкиннің (GGG) отаны екенін және жергілікті спортшылардың тәртібі мен техникасы элиталық деңгейде екенін жақсы білемін - жекпе-жек өнері мұнда қанда бар екені анық", - деп атап өтті ол.

Мэтт Маңғыстауда Қазақстан туымен. Фото: _mjbarz

Асылған ет пен бауырсақ

Сапар барысында қазақ асханасымен танысу да назардан тыс қалмады. Мэтт пен оның бөлесі әртүрлі жергілікті тағамдардан дәм татуға тырысқан, бірақ оларға бәрінен де асылған ет пен жаңа піскен бауырсақтар ұнаған.

"Тағамдары өте тойымды, ақуызға бай - ұзақ көлік сапарлары мен жорықтар үшін таптырмас қуат көзі", - деп бөлісті Мэтт.

"Қазақ қонақжайлылығы"

Мэтт жергілікті тұрғындардың қонақжайлылығын сапардан алған ең жарқын әсерлердің бірі деп атады.

Саяхатшының есінде әсіресе соңғы күн ерекше қалды. Британиялықтар теңіз жағасындағы барға кіріп, жергілікті жұппен танысқан. Бұл әңгіме нағыз шытырман оқиғаға ұласқан: жаңа таныстары оларды достарының ортасына қосылуға шақырған.

"Бөлем екеуміз теңіз жағасындағы барға кіріп, жергілікті ерлі-зайыптымен сөйлесіп кеттік, нәтижесінде... сусын ішіп, олармен және достарымен бірге кемемен айлақты араладық, үйлеріне қонаққа бардық, ал ол жерден бәріміз бірге түнгі барға барып, содан бірден Лондонға ұшатын рейске - әуежайға тарттық!" - деді ол.

Осылайша, кездейсоқ таныстық сапардың ең ұмытылмас сәттерінің біріне айналды. Жаңа қазақстандық достары Мэтт пен оның бөлесін әуежайға дейін шығарып салған.

Басқа саяхатшыларға қандай кеңес береді?

Мэтттің айтуынша, Қазақстан бойынша саяхаттау айтарлықтай жайлы болған. Алматы мен Ақтауда жүріп-тұру оңай болса, ал Маңғыстаудың қатал рельефімен танысу үшін ол джипті ең тиімді нұсқалардың бірі деп санайды.

Шетелдіктерге ол Маңғыстау облысында міндетті түрде джип-тур алуды, сондай-ақ Алматы таулары мен жайлы кофеханаларымен танысуға жеткілікті уақыт бөлуді ұсынды.

Оның пікірінше, мұнда міндетті түрде қайта оралу керек: бес күн аздық етті, сондықтан алдағы жоспарда - Қазақстанға қайта келіп, Алматы жартылай марафонына қатысу, ұлттық парктерді аралау және Алматы мен Ақтауда көбірек уақыт өткізу бар.

Мэтт бұл сапар Қазақстанды оның ең сүйікті туристік бағыттарының біріне айналдырғанын және елдің бірегей мәдениетін сезіну үшін әрбір адам мұнда міндетті түрде келуі керектігін атап өтті.

Бізді Google-дың негізгі дереккөздер тізіміне қосыңыз

Қосу