Пафос бапкері Қайрат пен Астана командаларын салыстырды

АСТАНА, 20 қазан – Sputnik. Кипрлік "Пафос" клубының бас бапкері, испаниялық Хуан Карлос Карседо Чемпиондар лигасының "Қайратқа" қарсы ойыны алдындағы баспасөз мәслихатында журналистердің сұрақтарына жауап берді.

"Қонақжайлылық үшін Қазақстанға көп рақмет, біз осында болғанымызға өте қуаныштымыз. Ертең біз өзімізге көп жағынан ұқсас және Чемпиондар лигасының осы кезеңіне алғаш рет шыққан "Қайратпен" ойнаймыз. Бізді қызықты ойын күтеміз", - деді Пафостың бапкері Хуан Карлос Карседо кіріспе сөзінде.

- Ертеңгі ойынның фавориттері кімдер деп ойлайсыз?

- Алаң иелерімен тең ойнаймыз деп ойлаймын. "Қайрат" да, біз де турнир кестесінің басындамыз. Ойын оңай болмайды, қиын матч күтеміз.

– Демалыс күндері "Этникосты" басымдықпен жеңдіңіздер. Бұл ертеңгі ойын алдында сіздің командаңызға қаншалықты сенімділік береді?

- Бұл жеңіс біз үшін өте маңызды болды. Өздеріңіз білесіздер, футболда келесі ойын ең маңызды. Өз алаңымыздан тыс жерде ойнау бізге оңай болмайды, біз бар күшімізді салуымыз керек, әйтпесе ұпай ала алмаймыз.

- "Пафос" иелері өте үлкен мақсаттарды алға қойып отыр. Бұл сізге қысым болып тұрған жоқ па?

- Біз реалист болуымыз керек. Чемпиондар лигасының әрбір ойыны өте қиын сынақ. Мұнда оңай командалар жоқ. Сондықтан біз әр командаға дайындаламыз.

- "Қайрат" Кипр чемпионатындағы қай командаға ұқсайды?

– "Қайраттың" біздің ішкі чемпионатта кімге ұқсайтынын білмеймін. Агрессивті, шабуылдаушы футбол ойнайтын "Ариске" ұқсайтын шығар.

- Ертең жеңіске жетуді қалай жоспарлап отырсыздар?

- Біздің басты күшіміз – допқа ие болу. Біз соңғы екі жыл бойы допқа иелік ету арқылы ойнадық және бұл бағытта айтарлықтай жақсардық. "Қайрат" – өте мықты команда, бұл оңай болмайды.

– Өткен жылы "Астанамен" ойнадыңыздар. Екі команданы салыстыра аласыз ба?

- Иә, біз "Астанамен" ойнадық. Екі команда да Қазақстан чемпионатында көш бастап тұр, бірақ менің ойымша, "Қайрат" "Астанадан" мықты команда.

– Қайраттың қай ойыншысын ерекше айтар едіңіз? Дастан Сәтбаев несімен ерекшеленеді?

- Дастан Сәтбаев өте талантты ойыншы. Келесі жылы ол "Челсиде" ойнайды. Бірақ біз бір ойыншыға көңіл бөлмейміз, тіпті олар өте талантты болса да. Біз команданың ойынына назар аударамыз.