Қайрат Пафос ойынына бір апта қалды

Алматылық «Қайрат» пен кипрлық «Пафос» кездесуіне бір апта қалды. Чемпиондар лигасының негізгі кезеңіндегі ойынның билеті кеше сатылымға шықты.

Жанкүйерлер билет бағасына алаңдаулы. Оның құны 30 мың теңгеден басталып, 250 мың теңгеге дейін жетеді. Клубтың баспасөз қызметі бұл УЕФА-мен келісілген баға екенін айтқан еді. Қыркүйек айының соңында өткен «Қайрат» - «Реал» кездесуіне де билет құны осындай болды. Соған қарамастан онлайн кассадағы кезек 250 мыңнан асып, бір күнде сатылып кетті. Алыпсатарлар да белсенді болды. Бұл жолы онлайн кассада ондай кезек байқалмайды. Дегенмен ресми билет сатушы сервис алыпсатарлармен күресті күшейту үшін жұмысты жетілдіріп жатқанын айтты.

Азамат Атагелдиев, Freedom ticketon компаниясының коммуникациялар жөніндегі директоры:

- Біздің негізгі мақсатымыз – ресми түрде, ресми бағамен және қолжетімді, ұйымдастырушылардың анықтаған бағасымен қоғамға билетті ұсыну. Қолданушымызға ыңғайлы болу үшін, алыпсатарлардың санын көп болмаса да азайту мақсатында өзіміздің арнайы бір шешімдеріміз бар. Бір ЖСН бойынша бір билет дегендей.