Павлодар облысын газдандыру: тұрғындарға қанша көгілдір отын қажет

Павлодар облысын газдандыру мәселесі 2024 жылдан бері талқыланып келеді. Сол кезде ҚР Энергетика министрлігінің, жергілікті атқарушы органдардың, «QazaqGas», ИОА, ҚТГА және КАТЭК институтының өкілдері кірген жұмыс тобы құрылған болатын.

- Павлодар облысының әкімдігі бастапқы деректерді жолдап, сол бойынша КАТЭК институты «QazaqGaz» ҰК-мен бірлесіп халық пен өнеркәсіптік тұтынушылардың газ тұтыну есептеулерін жүргізді. Өңірді газбен жабдықтаумен қамтудың есептік бағасы жасалды. КАТЭК институты Павлодар облысын газификациялау схемасын әзірледі, - деп хабарлады өңірлік энергетика және тұрғын үй-коммуналдық шаруашылық басқармасы экономиканың нақты секторы бөлімі басшысының міндетін атқарушы Әлішер Теміртас.

Павлодар облысына қажетті жылдық жалпы газ көлемі - 1,5 миллион текше метр. Оны жеке сектор тұрғындары да, кәсіпкерлер де пайдалана алады деп жоспарланған.

- Газ құбырларының құрылысы кезінде аймаққа қосымша инвестициялар тартуға мүмкіндік береді және табиғи газбен жұмыс істейтін жаңа кәсіпорындардың ашылуына жол ашады. Маңызды факторлардың бірі — экологиялық жағдайдың жақсаруы, бұл біздің өңір үшін өте өзекті. Бұдан бөлек, газдандыру жылу энергиясының тапшылығын жоюға, энергия желілеріне түсетін жүктемені азайтуға мүмкіндік береді, - деп толықтырды басқарма өкілі.

Қазіргі уақытта Павлодар облысына газ жеткізудің тек бір ғана схемасы бекітілген. Ол Ресейдің Омбы өңірінен Ертіс өзенінің бойымен Абай облысына қарай өтеді. Жоспар бойынша Павлодар, Екібастұз, Ақсу қалаларын, сондай-ақ барлық аудан орталықтарын қамту көзделуде. Оның ішінде Баянауыл, Шарбақты, Ертіс, Ақтоғай, Успенка ауылдарына тармақтар тартылады.
Өңірді газдандырудың болжамды мерзімі - 2030 жыл. Бұл орта мерзімді перспектива және көгілдір отынды жеткізудің екінші нұсқасы да бар.

Егер көршілес Ресеймен келісімге келу мүмкін болмаса, газ құбыры елорда жағынан тартылуы мүмкін. Барлық уағдаластықтар жасалғаннан кейін жобаны қаржыландырудың нақты сомасы белгілі болады.

Бұған дейін өңірлерде көгілдір отынға қолжетімділік артып келе жатқанын жазғанбыз.