Кеңгір ауылына ауызсу мен көгілдір отын жетті

Ұлытау облысындағы Кеңгір ауылына сапалы ауызсу мен көгілдір отын жетті.

10 жылдан бері тіршілік нәрін ашық су қоймасынан тұтынып келген жергілікті халықтың базынасы біздің арнамызда бірнеше рет көтерілген. Түйткіл шешімін тапты. Енді екі жарым мың тұрғын таза су тұтынады. Сондай-ақ көмір жағып, күл шығару бейнетінен құтылды.

Жезқазғанның іргесіндегі Кеңгір ауылының тұрғындары сапалы ауызсуды ұзақ күтті. Олар тіршілік нәрін тікелей ашық су қоймасынан тұтынатын. Крандағы су ішуге жарамаған соң әкімдік ауыл ішіне су тазалайтын бірнеше сүзгі орнатып берген. Енді ол күндер артта қалды, дейді ауыл тұрғындары. Биыл елдімекендегі су құбыры толық жаңартылып, Есқұла жерасты су қорынан келетін құбырға қосылды.

Кәдікен Мағзұмов, Кеңгір ауылының тұрғыны:

- Есқұла су құбыры арқылы Жезқазған қаласына трасса өтті. Жақында Есқұла су құбыры іске қосылып, осыдан таза су ішіп жатырмыз. Өзіміз пайдаланып отырмыз. Бұл су адамның ағзасына пайдалы деп ойлаймын. Оның құрамында минералдардың бәрі бар.

Ауыл тұрғындары көмір жағып, күл шығару бейнетінен де құтылды. Өңірді газдандыру бағдарламасы бойынша елдімекенге газ құбыры тартылды. Көгілдір отынға алғаш қосылған тұрғынның бірі - Рымтай Тұңғатова. Арқаның алты ай қысында кемінде 10 тонна көмір жағатын отбасы көгілдір отынның игілігін көріп отыр.

Рымтай Тұңғатова, Кеңгір ауылының тұрғыны:

- Осы уақытқа дейін пеш жағатынбыз, көмір жағатынбыз, күл шығаратынбыз. Міне, бүгін біздің ауылға көгілдір отын қосылып жатыр. Қуанып жатырмыз. Онымен қоса Есқұладан таза су келіп жатыр. Бұл деген үлкен қуаныш.

Кеңгір ауылын газдандыру жобасы көктемде басталған. 25 шақырым магистральдық және орамдық құбыр тартылды. Елдімекендегі әлеуметтік нысандар мен 500-ге жуық үйдің іргесіне дейін газ келіп тұр.

Дәмелі Дыбысова, Кеңгір ауылы әкімінің міндетін атқарушы:

- Қазіргі таңда газ реттеуіш мекемесіне 50-ге жуық абоненттер өтінім берді. Енді қазіргі таңда өз мердігерлерін таңдап, әр үй өздеріне ұнаған мердігермен шартқа отырып, газды үйлеріне тарту жұмыстарын жүргізіп жатыр.

Жалпы өңірді газдандыру жобасы 2021 жылдан бері жүзеге асырылып келеді. Осыған дейін Жезқазғандағы бірнеше шағын аудан мен Талап, Қабанбай ауылдары газға қосылды. 2029 жылға дейін 9 елдімекенге көгілдір отын жеткізіледі. Ал ауылдық елдімекендерді ауызсумен қамту көрсеткіші 99 пайыздан асты.

Авторлары: Елдос Кәкенов, Нұрбол Үздікбаев