Павлодарда күзгі ағаш егу науқаны жүріп жатыр

Биыл Павлодардың жасыл белдеуіне 20 мың көшет егіліп, қураған ағаштар кесілді.

Ал қаладағы саябақтар мен гүлзарларға 200 мың түп сәндік өсімдіктер егілді. Қазір өңірде күзгі ағаш егу науқаны қызу жүріп жатыр.

Павлодарда суыққа төзімді терек, қарағаш, үйеңкі, қайың мен  қарағай өседі. Коммуналдық мекеме осыдан 60-70 жыл бұрын егіліп,  қазір қурай бастаған   ағаштарды кесіп жатыр. Қаланың дендрологиялық жобасына сәйкес,  ағаш түрлерін жаңарту туралы   шешім қабылданған. Алдымен ұсақ жапырақты жөке ағаштары егілді.

Татьяна Пономарёва, биолог:

- Қураған, шіріген ағаштарды жаңартып отыру заманауи үрдіс. Мердігерлер ағаш еккен кезде ғалымдардың кеңесіне жүгінеді. Біз өз тарапымыздан жасыл желектің 100 пайыз жерсінуін қадағалап, тиісті шараларды жасаймыз.

Қаланы жасылдандыру   бойынша ауқымды жұмыс жоспары бекітілген. Күзгі ағаш егу науқаны әлі жалғасып жатыр. Шағын скверлер мен саябақтардың айналасы абаттандырылып, 200 мыңдай ағашпен қатар, биік емес сәндік өсімдік түрлері де егілді.

Мақпал Каржаубай, Қалалық әкімдіктің баспасөз қызметінің жетекшісі:

- Дендрологиялық жоспарға сәйкес Павлодар қаласын көгалдандыру жұмыстары аясында 20 мың түп ағаш көшеті егілді. Көшелердің бойына жөке ағаштарын аллея түрінде  егіп жатырмыз. Ал қаланың кіре берісіндегі жасыл белдеуді дамыту ісі әрі қарай да жалғасады.

Тұрғындар демалатын орын іздеп алысқа сабылмайды. Биыл көпқабатты үйлердің жанында шағын саябақтар пайда болды.

Бақытжан Қадырбаева, қала тұрғыны:

- Ішкі ауланың барлығын таза ұстайды. Демалыс күндері сенбілікке шығады. Барлығы таза деп ойлаймын. Өте әдемі, таза қалады тұрамын.

Биыл облыс орталығында ауқымды абаттандыру жұмысы қолға алынды. Әсіресе Лермонтов атындағы көшенің келбеті толықтай өзгерді. Әкімдік өкілдерінің айтуынша, мұндай шаралар алдағы уақытта қаланың басқа да аудандарында жалғасады.

Авторлары: Қарлығаш Қасиетова, Дәулет Қошқарбаев, Марат Игіліков