Педагогтер мен студенттер әскери жиындарға шақырылмайды

Фото: Қорғаныс министрлігі

Министрліктің мәліметінше, әскери міндеттілерді жергілікті әскери басқару органдары іріктейді. Олар Қарулы күштерге қажетті әскери мамандықтарға қарай таңдалады. Сонымен қатар азаматтардың денсаулық жағдайы, әскери дайындығы және заңда көрсетілген талаптарға сәйкестігі ескеріледі.

Жиынға қатысатын азаматтарға арнайы шақырту жіберіледі. Шақырту алғандар белгіленген уақытта көрсетілген орынға келуге міндетті. Егер шақырылған азамат себепсіз келмесе, оған 5 айлық есептік көрсеткіш көлемінде әкімшілік айыппұл салынады.

Заңға сәйкес, оқу жылы кезінде жұмыс істейтін педагогтер, күндізгі бөлімде оқитын студенттер, кәмелетке толмаған үш және одан да көп баласы бар әкелер жиынға шақырылмайды.

«Аталған іс-шаралар резервтегілердің даярлық деңгейін жетілдіру, практикалық дағдыларды жаңарту, заманауи қару-жарақ пен әскери техниканы меңгеру, сондай-ақ Қарулы күштерді жұмылдырудың дайындық деңгейін арттыру мақсатында ұйымдастырылады», делінген Қорғаныс министрлігінің хабарламасында.

Оқу-жаттығу жиындары бір айға дейін жалғасады. Осы уақыт ішінде қатысушылар азық-түлікпен, киім-кешекпен және медициналық қызметпен қамтамасыз етіледі. Сондай-ақ жаттығу өтетін жерге бару және қайту шығындарын Қорғаныс министрлігі өтейді.

Voenmart: Әскерилер азық-түлік пен түрлі тауарларға онлайн тапсырыс бере алады 

Жиынға қатысқан азаматтардың жұмыс орны мен қызметі сақталады. Жұмыс істейтіндерге орташа жалақы төленеді. Ал жұмыссыз азаматтарға мемлекет есебінен ең төменгі жалақы беріледі. Бұған қоса, оқу-жаттығу жиындарына қатысқан уақыт еңбек өтіліне енгізіледі.

Еске сала кетейік, биыл елімізде Қарулы күштер мен басқа да әскери құрылымдарға 18 бен 27 жас аралығындағы 21 мыңнан астам азамат шақырылады.