Педагогтерге онлайн қауіпсіздік бойынша міндетті тренинг енгізіледі

– 2026 жылдың 26 қаңтарында Үкімет қаулысымен 2026-2030 жылдарға арналған «Қазақстан балалары» тұжырымдамасы бекітілді. Оның аясында балаларды ақпараттық кеңістікте қорғаудың жаңа заңнамалық тетіктерін әзірлеу және енгізу шаралары көзделген. Тұжырымдаманы жүзеге асыру іс-қимыл жоспарында 158 іс-шара қарастырылған, - деді ол.

Вице-премьердің атап өтуінше, ата-аналардың балаларының онлайн-белсенділігін бақылауға, қауіпті контенттерге кіруін шектеуге мүмкіндік беретін «Ата-ана бақылауы» сервисіне қосылуға кеңес беріліп жатыр. Сонымен қатар байланыс операторларына ата-ана бақылауын міндетті опция ретінде тарифтік жоспарға қосу ұсынылған.

– Педагогтер үшін онлайн-қауіпсіздік, мектеп медиатоптарын құру, цифрлық тәуекелдерді анықтау бойынша міндетті тренинг енгізіледі. Педагогтердің білім беру процесінде жасанды интеллектіні қолдануы бойынша біліктілігін арттыру маңызды қадам болады. Ақпараттық құралдар кешенін жинақтаған «Кибер Тұмар – балаларды цифрлық ортада қорғаймыз» атты ақпараттық-білім беру науқаны іске қосылды, - деді Аида Балаева.

Айта кетейік, балалардың онлайн-платформаларға тіркелуіне тыйым салу үшін Еуропа тәжірибесі зерделеніп жатыр.