Перизат Қайраттың сәнді Mercedes көлігі мемлекеттік органдарға берілді

Перизат Қайраттан тәркіленген Mercedes-Benz S 450 мемлекет меншігіне өтті. Мұндай ақпарат электрондық сауда порталында пайда болды, - деп хабарлайды Tengrinews.kz тілшісі.

Перизат Қайраттан тәркіленген Mercedes-Benz S 450 мемлекет меншігіне өтті. Мұндай ақпарат электрондық сауда порталында пайда болды, - деп хабарлайды Tengrinews.kz тілшісі.

7 сәуірде электрондық саудада сотталған Перизат Қайратқа тиесілі болған Mercedes-Benz S 450 автокөлігі мемлекеттік органдардың меншігіне берілгені туралы ақпарат пайда болды.

"Мүлікті мемлекеттік заңды тұлғалардың теңгеріміне беру және бекіту. Сауда-саттық мәртебесі: Өтті", - делінген порталдағы хабарландыруда.

Әңгіме 777KPK01 мемлекеттік нөмірі бар, 2024 жылы шыққан қара түсті көлік туралы болып отыр. Құжаттамаға сәйкес, автокөліктің аккумуляторы отырып қалған, сондықтан оның техникалық жай-күйін тексеру мүмкін болмады. Көлікпен бірге Pandora дабылы бар кілт беріледі.

sauda.e-qazyna.kz сайтынан скриншот

Көліктің іші ақ былғарымен қапталған.

sauda.e-qazyna.kz сайтынан скриншот

Көліктің бағалау құны шамамен 79,4 миллион теңге болады. Сондай-ақ автокөлікке тыйым салу түрінде шектеу қойылғаны атап өтілген.

2025 жылдың қыркүйегінде Қаржылық мониторинг агенттігі Перизат Қайраттан тәркіленген мүліктің аукционға шығарылатынын хабарлады.

Бұл жерде активтердің үлкен жиынтығы туралы сөз болып отыр: Vela Village коттедж қалашығындағы жеке үй, Akbulak Riviera, Sensata Plaza, Highvill Ishim Gold және "Көк Жайлау" тұрғын үй кешендеріндегі бірнеше пәтер мен тұрақ орындары.

Сондай-ақ 2024 жылы шыққан Mercedes-Benz S450 көлігін қоса алғанда, Lexus LX 600, Mercedes-Benz EQE и Haval H6 GT секілді қымбат автокөліктер тәркіленген. Одан бөлек гүл кәсібіндегі 100 пайыздық үлесі мен қолма-қол 22 мың АҚШ доллары мемлекетке берілген.

Тәркіленген заттардың арасында брендтік бұйымдар да бар: әлемге әйгілі маркалардың күннен қорғайтын көзілдіріктері, аяқ киімдері мен аксессуарлары.

Перизат Қайрат — қазақстандық қоғам қайраткері және кәсіпкер. Үш жыл бойы ол Biz Birgemiz Qazaqstan 2030 қайырымдылық қорын басқарған.

2024 жылдың қарашасында Қайрат 1,5 миллиард теңге жымқырды деген күдікпен ұсталды. Бұл қаражат су тасқынынан зардап шеккендерге көмек ретінде жиналғаны айтылды. Бірақ тергеу нұсқасы бойынша, қаражаттың бір бөлігі Қайраттың жеке шығындарына - элиталық жылжымайтын мүлік, автокөліктер мен саяхаттарға жұмсалған.

Қор қаражатын қолма-қол ақшаға айналдыру үшін Қайрат туыстарын тартқан. Іс бойынша оның анасы Ғайни Алашбаева да сыбайлас ретінде өткен.

2025 жылдың наурызында оның Biz Birgemiz Qazaqstan 2030 қоры сот шешімімен жойылды.

16 шілдеде іс бойынша жәбірленушілер сотқа әлеуметтік желідегі жарнамаға сеніп, қайырымдылық көмек көрсетуге шешім қабылдағандарын айтты. Сондай-ақ сотта тергеу амалдары барысында тәркіленген мүліктің тізімі оқылды.

Нәтижесінде Перизат Қайрат 10 жылға бас бостандығынан айырылды. Оның анасы Гайни Алашбаева 7 жылға сотталды.