Президент Жарлығымен М. Мудрякқа мемлекеттік марапат табысталды

Президент Жарлығымен опера әншісі Мария Мудряк «Қазақстанның еңбек сіңірген қайраткері» құрметті атағына ие болды. Мемлекеттік награданы отандасымызға Рим қаласына іссапармен келген Мәдениет және ақпарат министрі Аида Балаева табыстады. 

Министр бұл жоғары атақ әншінің Қазақстан мәдениетінің дамуына қосқан зор үлесінің айқын дәлелі мен еңбек өтеуі екенін атап өтті. Мария Мудряк 25 жылдан астам уақыт бойы әлемнің жетекші опера сахналарында өнер көрсетіп, еліміздің атын шығарған. Ол өз буынының ең үздік лирикалық-колоратуралық сопрано иегерінің бірі болып саналады. Айта кетейік, ол 10 жасынан бастап Италияда вокалдық өнерді меңгеріп, 2014 жылы Миландағы Джузеппе Верди атындағы консерваторияны магистр дәрежесімен тәмамдаған.

Мария Мудряк, опера әншісі:

– Бұл - мен үшін зор қуаныш пен туған елім тарапынан берілген үлкен құрмет. Президентімізге шын жүректен алғыс айтамын. Менің өмір жолымда оның қолдауының орны ерекше. Мен небәрі тоғыз жаста болғанда, Италияға оқуға кетер кезде белгілі бір қиындықтар туындағанда, Қасым-Жомарт Кемелұлы Сыртқы істер министрі ретінде осы мәселенің шешілуіне үлесін қосты. Биыл шығармашылық жолын таңдағаныма 28 жыл. Алдағы уақытта да өз Отанымды әлемнің опера сахналарында абыроймен таныстырып, туған жерім — Қазақстанға қызмет етемін деп сенемін.