Елордада үздік дәрігерлерге марапат табысталды

Тәуелсіздік алғалы елдің әлеуметтік-экономикалық дамуы қарыштады.

Әсіресе денсаулық сақтау саласының көші ілгерлей түсті. Республика күні қарсаңында салаға өлшеусіз үлес қосқан ақ халаттыларға ерекше құрмет көрсетілді. Денсаулық сақтау министрі үздіктерді арнайы марапаттап, төсбелгі табыстады. Сала басшысы елде жүрек, қан-тамыр, жүйке ауруларын емдейтін жоғары заманауи технологиялар енгізілгенін тілге тиек еті. Ана мен бала өлімін азайтуға бағытталған ілкімді жобалар тағы бар. Ал 2000 жылдан бастап елде 2,5 мыңнан астам денсаулық сақтау нысаны салынған. Биыл жыл соңына дейін  Протондық терапия орталығы мен циклотронды-өндірістік кешенінің құрылысы аяқталады.

Ақмарал Әлназарова, ҚР Денсаулық сақтау министрі:

- Өз кезегінде экономиканың өсуімен бірге елімізде денсаулық сақтауды дамытудың мемлекеттік бағдарламалары, кардиологиялық және кардиохирургиялық, онкологиялық қызметтерді дамыту, туберкулездің таралуына қарсы іс-қимыл жөніндегі бағдарламалар әзірленіп, қабылданды. Оларды іске асырудың негізгі нәтижелері - азаматтардың денсаулығын жақсарту, сондай-ақ аурулардан болатын өлім-жітімді азайту болды. Ана мен бала өлімінің көрсеткіштері айтарлықтай қысқарып, Ел Тәуелсіздігі жылдарындағы тарихи ең төменгі деңгейге жетті.

Жапырақ Епенова, Маңғыстау облысы перинаталдық орталығының директоры

- Маңғыстау облыстық перинаталды ұжымы «Белді перзентхана» деген үлкен марапатқа ие болып отыр. Маңғыстау облысы туу көрсеткіші бойынша бірнеше жылдан бері алдыңғы қатарда. Былтыр өзіміздің перзентхананың өзінде 8500 босану болды. Биыл 9 айда 5600 босану болды. Бізде 2023 жылдан бері ана өлімі жалпы облыс бойынша тіркелген жоқ.