Президент: Жастарға сенім артып, жауапкершілік жүктеу керек

Қазақстан Президенті Қасым-Жомарт Тоқаев сайлау учаскесіне барып, дауыс бергеннен кейін тілшілердің сұрақтарына жауап берді, – деп хабарлайды Aikyn.kz сайты.

Jibek joly телеарнасының тілшісі Ділназ Ерланқызы Мемлекет басшысынан Құрылтай депутаттығына үміткер жастардың жаңа органның жұмысына қандай серпін бере алатынын сұрады.

Президент жастарға сенім артып, оларға жауапкершілік жүктеу қажет екенін атап өтті. Сонымен қатар жоғары қызметке келген жастардың бәрі бірдей өзіне жүктелген міндетті мінсіз атқара алмағанын айтты.

Jibek joly телеарнасының тілшісі Ділназ Ерланқызы: «Сіз Мемлекет басшысы ретінде жастарға сенім артып, оларға ұдайы қолдау көрсетіп келесіз. Құрылтай депутаттығына үміткерлер арасында түрлі салада жемісті еңбек етіп жүрген жастар бар. Сіздің ойыңызша, олар Құрылтай жұмысына серпін бере ала ма?» деп сауал қойды.

– Оны көре жатармыз. Біз жастарға сенім артамыз. Оларды кезінде түрлі лауазымдарға тағайындадық. Үкіметте жоғары қызмет атқарған жастардың бәрі өзіне жүктелген міндетті мүлтіксіз орындады деп айта алмаймын. Әрине, түрлі кедергі мен себеп кезігіп жатады. Дегенмен жастарға сенім артып, жауапкершілік жүктеу керек. Онсыз болмайды. Қазақстан – демография тұрғысынан жас мемлекет. Сондықтан жастарға зор сенім артамыз. Олар да бұған дайын болуға тиіс. Әйтпесе, кезінде министр болып, Үкіметке келген соң жұмыстың берекесін кетіргендер де болды. Бұған жол бермеуіміз керек, – деді Мемлекет басшысы.