Принц Гарри мен Меган Маркл Ұлыбританияға оралады

Ханзада Гарри мен Меган Маркл Ұлыбританияға ұзақ мерзімге оралуға ниетті, деп хабарлайды Tengrinews.kz тілшісі Daily Mail басылымына сілтеме жасап.

Басылымның мәліметінше, бұл шешім тіпті Ұлыбритания королі Карл III үшін де күтпеген жағдай болды. Оған ұлының елге оралатыны туралы тек 16 тамызда хабарланған.

Сассекс герцогы мен герцогинясы тамыз айының соңында Ұлыбританияға оралады деп күтіледі. Олармен бірге балалары - жеті жасар Арчи мен бес жасар Лилибет те келеді.

Мәліметтерге сүйенсек, балалар британдық мектепке қабылданып қоюы мүмкін, ал отбасы елде оқулары аяқталғанша ұзақ уақыт тұруды жоспарлап отыр.

Сонымен қатар Гарри мен Меган корольдік отбасының ресми міндеттерін атқарушы мүшелері ретінде оралуға ниетті емес. Олар корольдік иеліктерге жатпайтын жеке резиденцияда тұратын болады.

Қауіпсіздік пен құпиялылық мақсатында Гарри мен Меганның жаңа үйінің қай жерде орналасқаны әзірге жарияланбады. Бұл ретте ерлі-зайыпты Калифорния штатындағы Монтеситода орналасқан, құны шамамен 11 миллион фунт стерлинг болатын зәулім үйлерін сақтап қалады. Олар бұл үйді 2020 жылы АҚШ-қа көшкеннен кейін сатып алған болатын. Бұдан бөлек, Гарри мен Меганның Португалияда да жылжымайтын мүлкі бар.

Басылым дереккөзі Карл III кіші ұлы мен оның отбасын жиі көру мүмкіндігіне қуанышты екенін атап өтті. Дегенмен, Гарри мен Меганның мәртебесі өзгермейді.

Осылайша, Сассекс герцогы мен герцогинясы корольдік отбасының атынан ресми міндеттерді атқармайды. Дереккөздердің айтуынша, дәл осындай формат бұған дейін де олардың өз қалауына және қол жеткізілген келісімдерге сәйкес келген.

Егер Гарри мен Меган коммерциялық қызметтен бас тартса, болашақта олардың мәртебесі өзгеруі мүмкін бе, жоқ па, ол жағы әзірге белгісіз. Дереккөздер ерлі-зайыптының жоспарында корольдік отбасының тұрақты мүшесі ретінде оралу мәселесі қарастырылмағанын айтады.

Еске сала кетейік, Гарри мен Меган 2020 жылы корольдік отбасының ресми мүшесі мәртебесінен бас тартып, Калифорнияға көшіп кеткен болатын. Содан бері ерлі-зайыпты балаларын британдық тамырларымен таныстыру ниеті туралы бірнеше рет айтқан еді.

Google News арқылы жаңалықтарымызды қадағалаңыз