Қалам мен ғылым тоғысқанда

Асқар Тоқмағамбетов шығармашылығы сан салалы: ол – ақын, аудармашы, сатирик, драматург және публицист. Ендеше бұл еңбек – қаламгердің публицист ретіндегі даралығын зерттеуге арналған көп жылдық ғылыми ізденістердің жемісі. 

Кітап авторы – ғалымдықпен қатар ұстаз­дықты жанына серік еткен жан. Қашан көрсең де қайнаған іс басында жүреді. Түн баласы ұйқы көрмей дайындаған дәрісін шәкірттері алдында ерекше ықыласпен оқып тұрады. Оқытудың инновациялық жаңа әдістерін қолданады, медиа зерттеудің жаңа түрлерін студенттермен бірге іске асырады. Сабақ үстінде әр білім алушыға парақша ашқызып, пост жаздырады, оны әлеуметтік желілерге сол сәтінде салдырады, қаралым жинаудың тиімді әдістерін іс жүзінде көрсетеді, үйретеді. Осылайша, журналистке тән еркін шығармашылықты, жеделдік пен ұшқырлықты шәкірттер бір дәрісте-ақ меңгереді. 

Бір қарасаң, әріптестері арасында бі­лім бағдарламаларын заман талабына сай жаңарту, бүгінгі нарық сұраныстарын ес­кере отырып жаңа пәндерді енгізу туралы ұсы­ныстарын айтып, дәлелдеп отырады. Ай­тып қана қоймай, бүкіл құжаттарын реттеп, заңдастырып, келесі оқу жылында сол жаңа білім беру бағдарламасы бойынша білім алушыларды қабылдауды бастап та кетеді. Л.Гумилев атындағы ЕҰУ-дың Журналистика және әлеуметтік ғылымдар факультетіндегі «Медиаөнер» бакалавр мен магистратурасы, «Цифрлық медиакоммуникация» білім беру бағдарламалары осындай жанкешті еңбекпен жасалған. Мұндай телегей-теңіз еңбектің авторы – Телерадио және қоғаммен байланыс кафедрасының меңгерушісі, қауымдастырылған профессор Гүлмира Шайтмағамбетқызы. 

Ол қазақтың білімі мен ғылымының қарашаңырағы әл-Фараби атындағы ҚазҰУ-дың Журналистика факультетінде үш курс жоғары оқыды. Ғылыми ізденістеріміз қатар жүрді, кандидаттық диссертациямызды бір жылы қорғадық. Қаншама сараптаудан өтіп, министрлік бекітетін ғылыми жұмыс жазудың қиындығы мен қызығын сол жолдан өткендер жақсы біледі. Жаңа туған сәбиін ата-анасына қалдырып, басқа қалада диссертациясын жа­зуына тура келді. Барлығы сәтті аяқталды. 

Жас ғалым-оқытушы ретіндегі қызметін туған жері – Қорқыт ата атындағы Қызылорда университетінен бастады. Сол жерде талай жылдан бері ұстаздық етіп келе жатқан аға буын әріптестермен тәжірибе алмаса жүріп үйренді. Біреуін ұстаз, екіншілерін дос тұтты, басқаларымен сыйласты. Өзін өнеге тұтатын шәкірттер қатары көбейді. Қарым-қатынаста әркез мәдениетті, қандай қызметте болса да, қандай даулы мәселе талқыланса да ешқашан біреуге дауыс көтеріп, көңілге тиер сөз айтқанын көрген де, естіген де емеспіз. 

Қызылорда облысында журналистік білім берумен ғана шектелмей, аймақтық БАҚ пен медианы дамытуға, яғни журналистиканың тәжірибесіне зор үлес қосты. Аймақтың имиджі­не әсер ететін қоғамдық-мәдени іс-шараларға белсене атсалысты. 

Қандай жұмысты қолға алсаң да, жан-тәніңмен беріле істеу ғана нәтижеге жеткізері хақ. Бұл тұрғыдан Гүлмира Шайтмағамбетқызы үнемі ізденіс, даму үстінде. Жаңа шыққан кітаптарды арнайы алдырып оқып, баспасөз бен әлеуметтік желілерді шолу – күнделікті әдеті. 

Ұстаздық – ата-анасынан жалғасып келе жатқан, қанға сіңген қасиет. Өзімен қоса, бауырлары да білім беру саласын таңдап, ата-ана үмітін жалғады.  Жұбайы Талғат екеуінен өрбіген ұл-қыздары да заман талабына сай керекті мамандықты игеріп, еліміздің дамуына зор үлес қосып келеді.

Ғалия АҚСЕЙІТ,

Л.Гумилев атындағы ЕҰУ

Журналистика және әлеуметтік ғылымдар

факультетінің қауымдастырылған профессоры