Қарағанды облысында диабет дерті дендеп тұр

Өңірде кеселге шалдыққандар саны 40 мыңға жеткен.

Соның 2 мыңға жуығы инсулинге тәуелді. Ересектер ғана емес, балалардың да сырқаттануы жиілеген. Тіпті жаңа туған сәбилердің де осы аурумен ауыратыны анықталды. Дәрігерлер дерттің  дер кезінде алдын алмаса, адамдардың мүгедек болу қаупі жоғары деп дабыл қағады.

Жанына шипа іздеген жандардың бірі Нұрбол Күнеділов. Оның қант диабетіне шалдыққанына он жылға жуықтапты. Қазір облыстық клиникалық ауруханада ем қабылдап жатыр. Бұған дейін бармаған жері мен ішпеген дәрі-дәрмегі жоқ. Кейінгі кездері тез шаршап, ашуға жиі бой алдыратын болып кеткенін де жасырмайды. Сондықтан қауіпті дерттің алдын алу үшін өзіңді күтіп, дәрігерге уақытылы қаралып отыру қажет,-дейді ол.

Нұрбол Күнеділов, қала тұрғыны:

- Бұл ауруды өте қалай пайда болу әсері  сіз білмей де қаласыз. Сіздің ойлау жүйеңізге байланысты. Қандай бір стрресс болған жағдайда, осы ауру пайда болады. Тамақтану жүйесін қалыптастыру, дәрігердің не айтқанын соны бұлжытпай орындау арқылы ғана жеңіл шешіледі деп ойлаймын. Осы клиникаға жылына бір рет жоспарлы түрде жатамын.

Руслан Нұрланұлы, тілші:

- Қарағанды облысында 40 мың адам қант диабетімен ауырады. Соңғы екі жылда бұл дертке шалдыққандар 8 пайызға көбейген. Қант диабетімен ауыратындар қатарында ересектер ғана емес, балалар да бар. Тіпті жаңа туған сәбилерде де кездесіп жатыр дейді дәрігерлер.

Былтыр дерт меңдеген 100-ге жуық науқасқа операция жасалыпты. Өкінішке қарай саусағы мен аяғын кесуге тура келген жағдайлар көп. Өңірде 450 бала осы ағзаның созылмалы ауруымен ауырады. Олардың басым көпшілігі  инсулинге тәулі.

Евгений Морозов, диабеттік табан орталығының директоры:

- Қант диабетімен ауыратындар екі топқа бөлінеді. Біріншісі туабітті, яғни адамның ағзасында глюкоза игерілмейді. Сондықтан өмір бойына инсулинге тәуелді болып жүреді. Ал екіншісі-жүре дертке шалдыққандар. Оған дұрыс тамақтанбау, денсаулыққа күтім жасамау, қатты уайымға берілу сынды себептер түрткі болуы мүмкін.

Қант диабетімен ауратындар саны күрт өсуіне байланысты, бұл диагнозбен енді есепке алынған тұрғындар да қазір орталыққа шақыртылады. Олар бір жерде кешенді медициналық тексеруден өтіп, өзіне қандай күтім қажеттігін біле алады. Бірінші кезекте дұрыс тамақтану қажет. Көпшілік арасында сусамыр дерті көбеймес үшін қазір өңірдегі емханаларда дұрыс тамақтануды үйрететін кабинеттер  жұмыс істейді. Ауруын асқындырып алмас үшін науқастарға  осындай профилактикалық шара жүргізудің  маңызы зор, дейді дәрігерлер. 

Руслан Нұрланұлы, Сайлау Игіліков, Аман Хамит