Қарағанды облысында жаңа демалыс орындары салынады

Қарқаралы да Алматыдан еш кем түспейді. Ондағы Бұғылы тауының баурайына жаңа демалыс орындары салынады.

Қазір мұнда инфрақұрылым тартылып жатыр. Әсем табиғат аясындағы 18 жер учаскесі өміршең туристік жобасын ұсынған инвесторларға ұзақ мерзім-ге жалға беріледі. Өңірде бұл салаға құйылған қомақты инвестицияның арқасында Бұйра-тау, Қызыл-арай таулы өлкелері мен Балқаш көлі жағалауында да туризм жан-жақты дамуда. 

Қарқаралыда 40-қа жуық демалыс орны бар. Олар бір мезетте 2500 адамға қызмет көрсете алады. Бірақ бұл жеткіліксіз. Былтыр таулы өлкеге 32 мың турист келсе, биыл жаздың үш айының өзінде 20 мың адам келген. Бұл - жол инфрақұрылымының жақсаруымен байланысты,-дейді жергілікті билік өкілдері. Осыған орай Бұғылы тауының баурайында жаңа демалыс орындарын салу үшін 75 гектар жер бөлініп отыр. Мұндағы жер учаскелері кәсіпкерлерге ұзақ мерзімге жалға беріледі.

Мейірлан Сәдуақасов, Қарқаралы ауданы Құрылыс, сәулет және қала құрылысы бөлімінің меңгерушісі:

- «Бұғылы» туристік-рекреациялық аймағы, жоба құны - 4 млрд 423 млн теңге. Жерлердің конкурс арқылы иелерін танып, сол кісілер өздері кейінгі талапқа сай демалыс орындарын салады. Қосымша ол жерде дәмханалар, ойын алаңдары болады.

Ендігі міндет демалыс орындарына жалға берілетін жерді инфрақұрылыммен қамту. Биыл электр желісі, су және кәріз жүйесі тартылды. Ал келер жылы жол салынады.

Қанат Айдаров, мердігер:

- 15,7 шақырым тоқ тартылды. Кәріз жүйелері, суы тартылды. Келесі жылы асфальт салу керек, брусчаткалары қойылуы керек. Сол жұмыстарымыз қалды.

Қарағанды облысы туризмге инвестиция салғысы келетін кәсіпкерлер үшін тартымды өңірге айналып отыр. Биыл бүл салаға 23 млрд теңге  инвестиция құйылған. Соның негізінде Қарқаралы, Бұйра-тау, Қызыл-арай таулы өлкелері мен Балқаш көлі жағалауында туризм жан-жақты дамып келеді.

2028 жылға дейін туризм саласын облыс экономикасының негізгі драйверіне айналдыру көзделген. Өңірде 35 инвестициялық жобаны жүзеге асыру жоспарланған. Инвестиция тарту үшін болашағы бар туристік өлкелер таңдалып алынып, арнайы жол картасы жасалған.

Авторлары: Руслан Нұрланұлы, Сайран Ақамбаев, Аман Хамит