Қостанайда жаңа демалыс орындары салынды

Қостанайда Республика күні қарсаңында жаңа саябақтар мен скверлер халық игілігіне берілді.

Биыл облыс орталығында бес жаңа демалыс аймағы абаттандырылып, жасыл желекпен көмкерілді. Ең ірісі төрт гектардан астам аумақты алып жатыр. Мұнда тұрғындар үшін жаяу жүргіншілер гүлзарлары, спорт және балалар алаңы салынды.

Қостанай тұрғындарының саны соңғы бір жылда бес мың адамға артқан. Сондықтан демалыс пен спортпен айналысуға арналған қоғамдық орындарға сұраныс көбейген. Әкімдік мұндай нысандарды жыл сайын тұрғызып жатыр.

Құмар Ақсақалов, облыс әкімі:

- Мемлекет басшысы барлық қала мен ауылдарды абаттандыру бойынша ауқымды бағдарламаны жүзеге асыруды тапсырды. «Таза Қазақстан» аясында бүгінгі күні скверлер мен саябақтар салынып жатыр.

Төрт гектар аумақты қамтитын жаңа саябақ пен спорт аймағы бұрынғы ескі стадионның орнында бой көтерді. Жобаны іске асыруға 650 млн-нан астам теңге жұмсалған. Мұнда бір мезетте жүздегн адам демалып, спортпен айналыса алады.

Арсаин Байдәулетов, Қалалық құрылыс бөлімінің басшысы:

- Орталық бөлігінде 10 негізгі аймақ бар. Мұнда кәсіби тренажерлер мен заманауи балалар алаңдары орнатылған. Парк аумағында автоматты суару жүйесі қарастырылған. Жалпы 626 түп ағаш, 330 бұта және 24 мың 300 шаршы метр көгал егілді.

Демалыс орындары қаланың әр бөлігінде салынып жатыр. Әр адам өз үйінен бірнеше минуттық жерде саябаққа жете алады. Жақында ашылған жаңа сквер қазірдің өзінде жергілікті тұрғындардың сүйікті орнына айналған.

Гүлдарайым Мұқашева, қала тұрғыны:

- Енді балалармен ойнайтын боламыз, серуендейтін боламыз. Бұған дейін біз негізі осы үйдің қасында ауласында бар ойнайтын алаң сол жақта ойнайтын болғанбыз балалармен юос уақытымызда. 

Күздің соңына дейін Қостанайда тағы төрт жаңа демалыс аймағы ашылады. Ал келер жылы қала билігі барлық ауланы асфальттап, балалар мен спорт алаңдарын жаңартуды жоспарлап отыр.

Авторлары: Данияр Сұлтанұлы, Наталья Строкова, Сергей Трахтенберг