Қарағандыда украин қызы балаларға домбыра тартуды үйретіп жүр

Ол орыс мектебінде қазақша ансамбль құрып, шәкірттері түрлі байқауларда топ жарып жүр.

Ирина тоғыз жасынан домбыра шертеді. Бүркітті ауылындағы мектепте оқып жүргенінде үйірмеге қатысып, ұлттық аспапты меңгерген. Әкесі украин, анасы орыс болса да қазақша еркін сөйлейді.

Ирина Зважий, домбыра үйірмесінің мұғалімі:

- Мен басында баянға барғам. Сосын бір күні директор шақырып алды, баян мұғалімі келмепті деді. Қай аспапқа барасың деді. Мен домбыраға барам дедім.

Мектепті бітіргенде оркестр құрамында өнер көрсетті. Талай байқауда топ жарды. Қазір Қарағандыда мектепте домбыра үйірмесінен сабақ береді.  30-ға жуық шәкірті аптасына екі рет жиналып, ән мен күй үйренеді. «Жігер» ансамблі облыстық, республикалық және халықаралық байқауларда жүлде алып жүр.

Ирина Зважий, домбыра үйірмесінің мұғалімі:

- Қазанғаптың, Құрманғазының, Дина Нүрпейісованың күйлерін ойнағанда сол кезге барғандай боламын. Ұнайды маған тарихқа кіріп аласың.

Күйші қыз шәкірттеріне сабақты ерекше ықыласпен береді. Балаларға ең әуелі шығарманың мазмұнын түсіндіреді. Себебі орындаушылар ән мен күйдің шығу тарихын терең ұғынып, тыңдарман жүрегіне жеткізе білуі қажет. Қазір ансамбльдің қоржынында 10-нан астам музыкалық шығарма бар.

Әсет Төлдібай, «Жігер» ансамблінің мүшесі:

- Бір досымның арқасында білгем біздің мектепте домбыра бар екенін. Өзім қызығып келдім. Домбыра негізі жақсы, әсіресе мұғалім. Дұрыстап түсіндіріп, сабақты жақсы өткізеді.

Иринаның өмірлік серігінің ұлты неміс. Екеуі балаларын бесік жырымен әлдилеп, домбыра үйретіп өсірген. Қазақтың салт-дәстүрін ерекше ұстанады, дейді әріптестері.

Айжан Кәрібаева, №23 мектеп директорының орынбасары:

- Біздің мектебімізде 2012 жылдан бастап бірлесіп жұмыс істеп келе жатырмыз. Бұл кісі тәрбиелеген шәкірттер республикалық, халықаралық байқауларда орын алуда. Қазақ тілін жетік біледі, әзілдесіп, қалжыңдасып отырып оқушыларды жақсы тәртіпке шақырып, домбыраның әрбір пернесін, нотасын үйретуде ол таптырмайтын тапқырлық деп ойлаймын.

Иринаның ендігі арманы - өзге ұлт өкілдерінен оркестр құрып, сахнаға шығару.

Руслан Нұрланұлы, Аман Хамит