Полиция қызметкерлері балаларға жол жүру ережесін ойын түрінде үйретіп жүр

2025 жылы Қарағанды облысында жол-көлік оқиғасынан 300-ден астам бала түрлі жарақат алып, 15-і опат болды. Әсіресе қыс мезгілінде қайғылы жағдайлар жиілеп кетеді. Сондықтан балғындарға жол қозғалыс ережесін үйретіп, ескертіп отырудың маңызы зор. 

Қарағандыдағы балалардың ойын-сауық орталықтарында қазір аниматорлармен бірге, полиция қызметкерлерін де жиі кездестіресің. Олар да оқушылармен ойын түрінде танымды викториналар өткізеді. Бастысы балаға қызықты, түсінікті тілде жол қауіпсіздік ережесін үйрету. 

Іңкәр Аман, оқушы:

- Полиция қызметкерлері келді. Бізге жол ережесін және жолда жүру кезде абай болу керек екенін ескерткен.

Мұғалімдер де мұндай шараларды қолдайды. Олардың пікірінше, полиция қызметкерлерімен бетпе-бет жүздесіп, айтқан ақыл-кеңестерін балалар тез қабылдайды. 

Сәуле Сәкен, мұғалім:

- Осының ішінде балалар жол ережесі туралы өзінің ойларын айтып, ойындарға қатысты. Бұл акциялар оқушыларға жол ережесін сақтауы үшін өте маңызды деп ойлаймын. Қазір өйткені автокөліктер өте көп, жол режесін балалар сақтауы керек. 

Қарағанды облысында былтыр 251 жол-көлік оқиғасында балалардың қатысы болды. Соның салдарынан 300 бала түрлі жарақат алып, 15-і қаза тапқан. Ең ауыр әрі елдің жағасын ұстатқан оқиғалардың бірі Қарағанды-Балқаш тас жолында тіркелді. Минивэн жол қоршауына соғылып, көлік бірден өртке оранған. Қайғылы апат орнында екі әйел мен бес бала көз жұмды.

Татьяна Малиновская, облыстық ПД Әкімшілік полиция басқармасының аға инспекторы:

- Қарағанды облысының тұрғындарына айтпағым, жол қозғалыс ережесін сақтаңыздар. Жолда бір-біріңізге сыйластық танытыңыздар. Балалардың амандығы, қауіпсіздігі бірінші орында тұруы қажет. Соны ересектер ұмытпағаны абзал. 

Полиция қызметкерлері мұндай іс-шараларды мектепте, көшеде, ойын-сауық орталықтарында ұдайы өткізіп тұруды жоспарлап отыр. Бұл үрдістен ата-аналарда қалыс қалмаса дейді. Үлкендер жолда жүру ережесін сақтау арқылы үлгі көрсетсе, балаға бұл да үлкен сабақ болмақ. 

Авторлары: Мағауия Қалиев, Лиана Жамлиханова, Сайран Акамбаев, Аман Хамит