Қателік жасадым : Маңғыстау әкімі некесіз туған ұлы туралы сұраққа жауап берді

АСТАНА, 23 желтоқсан – Sputnik. Маңғыстау облысының әкімі Нұрдәулет Қилыбай Орталық коммуникациялар қызметінде өткен брифингте өзінің некесіз туған ұлына қатысты сұраққа ашық жауап берді, деп хабарлайды Sputnik Қазақстан.

Оның айтуынша, заңға сәйкес алимент төлеп отыр.

"Бұл – менің жеке өмірім. Желіде ақпарат "сот ДНҚ арқылы баласы деп тануды міндеттеді" деп тарады. Бұл шындыққа жанаспайды. "Сот менің өтінішімді қанағаттандырды" деп айтқан дұрыс болады. Себебі 2021 жылы туған баланы ұлым деп тану үшін сотқа өзім жүгіндім. Қазір заңға сәйкес алимент төлеп отырмын", – дейді облыс әкімі.

Алайда қанша көлемде алимент төлеп отырғанын айта алмады.

"Жалақымның 20%-ы көлемінде төленеді. Оны бухгалтериядан сұрау керек. Осындай жағдай болды. Өкінемін. Менің бір кездері жасаған қателігім", – дейді Қилыбай.

Бұған дейін Нұрдаулет Қилыбай облыс мәслихатының бұрынғы депутаты Ынташ Наурызованың ұлының әкесі деп танылды.