​Қатты желден кейін Атырау облысының аудандарында арнайы комиссия жұмысқа кірісті

13 желтоқсаннан бері қатты желдің салдарынан Атырау облысының бірнеше ауданында тұрғын үйлер мен әлеуметтік нысандарға зақым келді. 

Шатыр ұшу, ғимараттың қасбеті түсу, жарықтың бірнеше сағаттап өшуі орын алды. Жел, жаяу бұрқасынның кесірінен кейбір аудандарда уақытша жол қатынасы үзілді. Табиғаттың тосын "мінезінен" кейін аудандарда штаб құрылып, кезекшілік ұйымдастырылуда. Зардаптарды арнайы комиссия екшелеп жатыр. 

Индер ауданы әкімінің орынбасары Артур Мурзиннің айтуынша, Бөдене мен Жарсуаттан басқа ауылдарда жарықсыз қалу дерегі тіркелген. 

"Бірнеше сағаттан кейін іске қосылғанша мамандар сағатпен санаспай, табиғаттың қаталдығына қарамастан жұмыс жасады", деп атап өтті ол. 

Индер ауданында Көктоғай ауылындағы өрт сөндіру депосы, Өрліктегі екіқабатты үй, Индербор кентінде Нұрманов көшесіндегі №48 үйдің 50 шаршы метр шатырлары жерге түскен. Кенттегі колледждің шатыры әлсіз күйде тұрған көрінеді.

Мақат ауданында Бәйгетөбе орта мектебінің 300 шаршы метр шатыры ұшқан. 

Құрманғазы ауданы әкімшілігің мәлімдеуінше Балқұдық ауылындағы мектептің 150, клубтың 120 шаршы метрі, Қиғаш орта мектебінің 50 шаршы метр төбе жабындысы жарамсыз болған. Орлы ауылдық округіндегі амбулаторияда да зақым болған жерлер бар. 

Махамбет ауданы әкімі Қайрат Нұрлыбаевтың мәлімдеуінше аудандық емхананың 520 шаршы метр шатыры ұшса, 60 пәтерлік үйдің жабындысының кей бөлігі жарамсызданған. Сарайшық пен Алға ауылындағы жеке үйлердің төбелері ұшып кеткен. 

Исатай ауданында кейбі ауылдар жарықсыз қалып, кейін іске қосылса жалпы жағдай бірқалыпты көрінеді. 

Жылыой ауданында Құлсары қаласындағы ықшам аудандарда жарық өшу, оны қалыпқа келтіру жұмыстары жүріп жатқан көрінеді. Ал алыс қыстақтардағы малшыларға жағдай түсіндіріліп, жіті бақылауға алынған.

Ләззат ҚАРАЖАНОВА

Кеше, 10:54