Атырау облысының ықшам аудандарында жол жоқ

Атырау облысы Жылыой ауданындағы екі бірдей ықшам ауданның тұрғындарын жол мен жарық мәселесі алаңдатып отыр. Қос шағын ауданның шағымын арқалаған тұрғындар арнамыздың редакциясына хабарласты. Олардың айтуынша мұндағы жер учаскелері жеті жыл бұрын беріле бастаған. Қазір онда үйлердің саны 600-ге таяды. Алайда әлі күнге дейін инженерлік инфрақұрылым толық тартылмаған. 

«Болашақ» ықшам ауданының қазіргі сиқы осы. Жол жоқ. Көше жарығы жүргізілмеген. Қар мен жаңбырда жүру оңай емес. Балалардың сабаққа баруы да мұңға айналды,- дейді тұрғындар. Өйткені жаңа шағын ауданда білім ордасы әлі салынбаған. Ал оқушылар 5-6 шақырым жердегі мектепке қатынайды. Бұған қоса ықшам аудан тұрғындарын интернет мәселесі де алаңдатып отыр. 

Мәрзия Күжбанова, Құлсары қаласының тұрғыны:

- Ертең жаңбыр жауса, балалар жүре алмайды. Сайдың ішімен кетеміз қазір. Жаңбыр жауатын болса, сайдың іші жүретін жері жоқ, су болып қалады, суға толып. Арғы жағымен айналып жүргенде 1-2 сағат жүреміз маршрутқа қарай. Сол жол мәселесі қиын. Қазір енді күн құрғақ болғасын барып-келіп жүр ғой балалар.

Жексен Қаспаев, Құлсары қаласының тұрғыны:

- Екінші мәселе, интернет жағы. Ешкім хабарласа алмайды. Интернет жоқ. Балалар қаламен хабарласа алмай отыр. интернет жағын орнатып берсе деген сауалымыз бар.

Жаңадан бой көтерген «Атырау» ықшам ауданының да жағдайы мәз емес. Мердігердің жауапсыздығынан мұнда жол құрылысы басталып, аяқсыз қалған.

Асланбек Шығыр, тілші:

- Атырау шағын ауданында жер учаскелері 2018 жылы беріле бастады. Қазір мұндағы үйлердің саны 500-ге жетті. Жеті жылдан бері жол, жарық мәселесі реттелмеген. «Кеш түссе тас қараңғы. Әсіресе, мектепке баратын балалар үшін қиын», - дейді тұрғындар.

Қамажай Жұбаева, Құлсары қаласының тұрғыны:

- Жарық жоқ мына көшенің бойында тұратын. Көшемізде скамейка да жоқ. Балалар ойнайтын алаң да жоқ. Бізде жарық жиі өшеді. Сосын интернет те жоқ. Сеть жоқ ауылда. Есігіміздің алдына, сыртқа шығып сөйлесеміз балаларымызбен сөйлесейік дегенде.

Құлсары қаласы әкімінің айтуынша, қос ықшам ауданның да мәселесі кезең-кезеңімен шешіледі. «Атырау шағын ауданындағы аяқсыз қалған 22 шақырым жолды салу үшін қазір қайтадан мердігер анықталып жатыр. Ал «Болашақ» ықшам ауданына жол келер жылы салына бастайды», - дейді қала әкімі Қадіржан Адинов. 

Қадыржан Әдинов, Құлсары қаласының әкімі:

- 2018 жылы «Болашақ» ықшам ауданына жалпы ұзындығы 63 шақырымды құрайтын асфальт жол салу жұмыстарының жобалау-сметалық жасақталған болатын. Алайда сметалық құндардың өзгеруіне байланысты қазір түзетулер енгізіліп жатыр жобаға. Сараптаманың оң қорытындысы алынған соң 2026 жылы қаражаттың бөлінуіне қарай құрылыс жұмыстары басталатын болады.

Ал ықшам аудандарды жарықтандыру үшін жобалық-сметалық құжаттама әзірленіп, сараптамаға жіберілген. Жалпы Құлсары қаласы бойынша 280 көшеге жалпы ұзындығы 134 шақырым көше жарығы жүргізіледі. 

Авторлары: Асланбек Шығыр, Айбек Байзақов, Амантай Мәтенов