Атырау облысының шалғай аудандарында оңалту орталықтары ашылады

Атырау облысы Мақат ауданында мүгедектігі бар жандарды оңалту орталығы ашылады.

Оның ішінде ерекше балаларға арналған бөлімдер болады. Иппотерапия және еңбекке баулу үйірмесін ашу жоспары бар.

Бұл сал ауруы, жүрек талмасы бар және аутизм дертіне шалдыққан балаларға қолдау болғалы тұр. Жалпы облыста мүгедектігі бар 4,5 мыңға жуық адам тіркелген.  Енді мақаттық науқастар тұрғылықты жерден ем алатын болады.

Мақат кентіндегі бұрынғы аудандық емхананың 3 қабатты ғимараты  көптен бері бос тұрған еді. Биыл жергілікті билік нысанды жөндеуге бюджеттен 753 млн теңге бөліп, оңалту орталығын ашуды жоспарлады.  Қазір орталық құрылысының  80 пайызы аяқталып тұр. 

Саламат Жұбанышев, мердігер мекеме өкілі:

- Ішінде балаларға арналған мед.кабинеттер болады. Дене шынықтыру кабинеттері, иппотерапия сыртында, тауық ұстауға арналған орын, жылыжай. Балаларды еңбекке баулу, сондай жағдайлар жасалады. Қазір енді брусчатка жұмыстары қалды. 

Арыстанбек Кенже, тілші:

- Мақат ауданы бойынша 1200-дей адам мүгедектігі бар деп тіркелген. Оның ішінде 200-дей 18 жасқа дейінгі бала түрлі жүйке ауруларына шалдыққан. Бұл оңалту орталығы соларға қызмет көрсететін болады. 

Облыста мүмкіндігі шектеулі жандарға қызмет көрсететін 4 орталық бар. Мақаттықтарды бұрын 120 шақырым жердегі Атырауға жіберетін. Дегенмен, көбінің мүмкіндігі бола бермейтін.  

Гүлжанар Өтешова, аудандық жұмыспен қамту және әлеуметтік бағдарламалар бөлімінің басшысы:

- Қазіргі таңда әлеуметтік қызметтер көрсету Орталығы  аудан бойынша 1,5 жастан 18 жасқа дейінгі балаларға қызмет көрсетіп отыр және қазіргі таңда жалдамалы ғимаратта отыр. Ол жерде 8 түрлі қызмет  түрі көрсетіледі. Барлық мамандармен қамтылатын болады. Ғимарат толық стандартқа сай жасақталып жатыр. 

Биыл облыстағы 4 оңалту орталығы 500-дей науқасты қамтыды. Өңірде мүгедектігі бар 4,5 мың адам барын ескерсек, орын таршылығы бар. Сондықтан иппотерапия және басқа да оңалту қызметтерін шалғай аудандарда  ашу қолға алынады. Келесі жылы ауыл-аймақтағы 320 баланы қамтитын орталықтарға 120 млн теңге бөлінді. Сондай-ақ 2026 жылы екі ауданда  орталық ашу көзделген.

Арыстанбек Кенже, Айбек Байзақов, Жандос Рахметуллин