Алматы облысының шалғай ауылдарына табиғи газ жетті

Алматы облысының Шарын мен Бахар елді мекеніне газ құбыры тартылып, тұрғындар көгілдір отынның қызығын көре бастады. Жақында Тасқарасу ауылында табиғи газдың алғашқы алауы тұтанады. Өңірде биыл шалғай елді мекендерді газдандыруға 11 млиллиард теңге бөлінді.

Шарын ауылына бір ай бұрын табиғи газ берілсе, енді 500-дей түтіні бар Бахар ауылының тұрғындары үйлерін көгілдір отынмен жылытуға мүмкіндік алды. Алғашқылардың бірі болып соғыс ардагері Алым Кебіровтың үйіне газ кірді. Қалған абоненттер де орталықтандырылған газ құбыры желісіне біртіндеп қосыла бастады.

Арманжан Алимов, А.Кебировтың немересі:

- Кебиров Алым ветеранның немересі боламын. Осы Бахар ауылының тұрғынымын. Газды бүгін кіргізді, тегін болды бәрі. Барлығына алғыс білдіреміз.

Азамат Ахметалиев, мердігер:

- Алдымызда енді Ташқарасу ауылымыз бар. Оны енді желтоқсан айында қосуға мақсат қойып отырмыз. СКЛ Ұйғыр ауданының Қалжат ауылы бар және де енді 20 елді мекен бар, соны газдандыруға атсалысып отырмыз қазір.

Бақанас, Миялы, Бақбақты, Бірлік, Ақдала, Бояулы ауылдарына да табиғи газ беріліп, 1500 үй көгілдір отының қызығын көріп отыр. Ақжар ауылы мен аудан орталығы Бақанастан салынып жатқан жаңа шағын ауданды газдандыру жұмыстарына биыл 1 млрд 200 млн-нан астам теңге бөлінді. Қазір ауыл ішіндегі көшелерге газ құбыры тартылып жатыр.

Гүлмәрия Шопанбаева, Ақжар ауылының тұрғыны:

Біз енді ауыл тұрғындары білесіздер, көмір аламыз қымбатттан, 40 мың бір тоннасы, 35 мыңнан. Отын түсіреміз кәдімгі ағаш отын жаңағы от жаққанға. Оның бәрі бізге ауырлық келтіреді. Оның бәрі қаржы. Ал енді мынау газ жүргізсе бізге жақсы болар еді. Газ деген енді жақсы ғой, қыста қосып қоямыз да, кететін жағымызға кете береміз.

Азат Құтпанбетов, Балқаш ауданының әкімі:

- Негізі 20 елді мекеннің 11 елді мекені осы 2027 жылға жоспарланып отыр. Сонда 55 пайызы 27 жылға, ал қалған 45 пайызы осы 30 жылға дейінгі бас жоспарда бар. Құйғанға дейін және Қаройға дейін осы газ құбырларын тарту жалпы 2030 жылға дейін жоспарланған.

Қаскелең Топар, Бала Топар, Құйған ауылдарында да табиғи газдың алғашқы алауы тұтанар күн алыс емес. Облыс бойынша қазір 1,2 млн тұрғын көгілдір отынның игілігін көріп отыр. Алдағы уақытта Кеген мен Райымбек аудандарына магистралды газ құбыры тартылады.

Авторлары: Ардақ Айбарұлы, Аят Дүйсенбаев, Аманжол Жөңкешов