Қызылорда облысының ауылдарына мемлекетке қайтарылған қаржы есебінен су құбырлары тартылды

Оның ішінде бес жоба Қазалы ауданында іске асырылды. Аудан әкімдігі баспасөз қызметінің хабарлауынша, биыл тұрғындарды ауыз сумен қамтамасыз етуге бағытталған төрт нысан, сондай-ақ бір медициналық мекеменің құрылысы басталды.

- Сарыбұлақ, Шилі, Шәкен, Шитүбек ауылдарын ауыз су жүйесіне қосу үшін республикалық және облыстық бюджеттен, сондай-ақ мемлекет меншігіне қайтарылған қаражат есебінен жалпы 1,5 млрд теңге бөлінді. Қазіргі кезде барлық құрылыс жұмыстары толығымен аяқталды, - делінген ресми хабарламада.

Атап өтілгендей, Сарыбұлақ, Шилі, Шәкен ауылдары аудан орталығынан біршама қашықтықта орналасқан. Бұған дейін бұл елді мекендердің тұрғындары ауыз суды бұлақтардан алса, Шитүбек ауылының тұрғындары суды өзеннен тасыған.

Бұдан басқа, қайтарылған қаражатқа аудандық көпсалалы орталық аурухана жанынан 42 төсек орынға арналған инсульт және кардиологиялық орталықтың құрылысы жүргізіліп жатыр. Құрылысты осы жылдың соңына дейін аяқтау жоспарланған. Сондай-ақ жергілікті тұрғындар үшін өте маңызды мәселе – магнитті-резонанстық томография (МРТ) жабдығы да сол уақытта орнатылады. Бұл инсульт, жүрек-қан тамырлары және басқа да аурулары бар науқастарды басқа өңірлерге бармай-ақ жергілікті жерде анықтап, емдеуге мүмкіндік береді.

Ал Ақтөбе облысындағы ауылдарда қайтарылған активтер есебінен жаңа медициналық мекемелер ашылды.