Қауіпсіздік пен тазалық үйлессе...

Қала әкімі Асхат Бердіханов ком­му­нал­дық жаға­жай­лар дема­­лу­шыларды қа­былдауға толық дайын екенін мәлімдеді. Әсіресе №5 жағажайда қауіп­сіздік мәселесіне ерекше көңіл бөлінген. Мұнда 12 құтқару мұнарасы орнатылып, 26 құтқарушы жұмыс істейді. Сонымен қатар жағажай аумағына 21 бейне­бақылау камерасы қойылған. Оның ішінде жасанды интеллект жүйе­сімен жұмыс істейтін камералар да бар. Барлық құрылғылар жедел басқару орталығына қосылған.

Жағажай аумағында сани­­тарлық тораптар мен тамақтану орындары жұмыс істейді. Күн сайын арнайы қызметкерлер жағалауды бірнеше рет қоқыс­тан тазартады. Ал жаяу жүр­гіншілер үшін кіру тегін.

Биыл №5 жағажайда жаңа 9D кинотеатры ашылды. Заманауи аттракцион форматындағы кинотеатрда көрермендер фильмді арнайы дыбыс, қозғалыс, өзге де эффектілер арқылы шынайы сезіне алады. Сонымен қатар қалада жаңа ойын-сауық орындары көбейіп келеді. Соның бірі «Жібек жолы» ЖШС салып жатқан аттракциондар паркі 10 маусымға қарай келушілерге есігін айқара ашатын болады.

«Бұл парк бірнеше жылдан бері салынып жатыр. Қазір соңғы дайындық жұмыстары аяқталуда. Жақын күндері демалушыларды қабылдай бастайды», деді қала әкімі.

Қалада биыл жаңа формат­тағы демалыс орындары да ашы­луда. Соның бірі – «VE RICCI» демалыс аймағы. Кешен отбасылық демалысқа арналған. Мұнда жайлы виллалар, бассейн­дер, тынығуға арналған арнайы аумақтар қарастырылған.

Биыл туристік ба­ғытта 11 инвестициялық жобаны жүзеге асыру жоспарланып отыр. Оның ішінде қонақүйлер, демалыс орындары мен гольф-клуб құрылысы бар.

Қауіпсіздік мәселесі де бас­ты назарда. Қалалық төтен­ше жағдайлар басқар­масы жаға­жай­­ларда сағат 20:00-ден кейін шомылуға тыйым салынатынын хабарлады. Күн сайын патруль­деу ұйымдастырылып, кеш­кі уақытта арнайы рейд­­­тер жүргізіледі.

Қала тұрғындары мен турис­тер де шомылу маусы­мы­ның ашылуын қуана қабылдады. Ашық суда жүзуден Қазақстан және әлем чемпионы Әмина Шынәділ Қапшағай су қоймасы су спортын дамыту бағытында қолайлы орындардың біріне айналып келе жатқанын айтты.

Қонаевта алдағы уақытта 5 ша­қырымнан астам жаға­жайды абат­тандыру жоспар­ланған. Жұ­мыс­ кезең-кезеңімен жүзеге асады.

Алматы облысы