​Қазақстан азаматы деректер базасындағы қате үшін полицияны сотқа берді

Астана қаласының мамандандырылған ауданаралық әкімшілік соты автокөлік тіркеу деректеріне заңсыз өзгеріс енгізу фактісі бойынша істі қарады. Талап қоюшы Б. Қарағанды облысы Полиция департаменті мен Қазақстан Республикасы Ішкі істер министрлігінің әрекеттеріне шағым түсірген.

Сот барысында талап қоюшының атына тіркеу куәлігінде 2012 жылғы «S» маркалы автокөлік рәсімделгені анықталды. Алайда 2024 жылғы 8 қыркүйекте техникалық байқаудан өту кезінде ол ақпараттық деректер базасындағы мәліметтердің сәйкес келмейтінін байқаған. Электронды жүйеде оның атына мүлде басқа — 2011 жылғы «C» маркалы, өзге VIN-коды мен техникалық сипаттамалары бар көлік тіркеліп тұрғаны белгілі болған.

Тексеру барысында бұл деректерді бұрын Қарағанды облысы ПД Әкімшілік полиция басқармасының Процессинг орталығын басқарған полиция қызметкері заңсыз енгізгені анықталды. Аталған тұлға 2023 жылғы 18 шілдеде Қарағанды қалалық сотының үкімімен Қылмыстық кодекстің 371-бабы 2-бөлігі бойынша, яғни қызметтік өкілеттігін асыра пайдаланып, ақпараттық жүйеге заңсыз дерек енгізгені үшін кінәлі деп танылған.

Сот талап қоюшы мен оның өкілінің «C» маркалы автокөлікті тіркеу туралы ешқашан өтініш бермегенін, ал деректердің уәкілеттіліксіз және қолданыстағы заң талаптарын бұза отырып өзгертілгенін анықтады.

Істі қарау нәтижесінде сот Қарағанды облысы Полиция департаментіне қатысты талапты қанағаттандырып, талап қоюшының атына тіркелген «S» маркалы автокөліктің бастапқы деректерін қалпына келтіруді және заңсыз енгізілген «C» маркалы көлік туралы мәліметтерді жоюды міндеттеді. Ал Қазақстан Республикасы Ішкі істер министрлігіне қатысты талап қанағаттандырылмады, себебі сұралған әрекеттер бұл ведомствоның құзыретіне кірмейді.

Осылайша, талап қою ішінара қанағаттандырылды. Қазіргі уақытта сот актісі заңды күшіне енген жоқ.

Бүгін, 11:30