Қырғызстан мигранттардың құқығын бұзғаны үшін Ресейді сотқа берді

Қырғызстан еңбек мигранттары туралы келісімді орындаудан бас тартып отырған Ресейге қарсы ЕАЭО сотына талап арыз берді. Жогорку Кеңештің еңбек және әлеуметтік мәселелер жөніндегі комитетінің отырысында Міндетті медициналық сақтандыру қорының төрағасы Азамат Муканов Ресей тарапы ЕАЭО келісімдерінде көзделген талаптарды орындамай отырғанын мәлімдеді, деп хабарлайды Egemen.kz.

Фото: ашық дереккөз

Оның айтуынша, Ресейде жұмыс істейтін еңбек мигранттарының отбасы мүшелеріне де міндетті медициналық сақтандыру (ОМС) полисі берілуі тиіс. Бұл талап бес мемлекет қол қойған келісімде нақты көрсетілген. Алайда қазіргі таңда Ресей тарапы осы келісімнің 96-97-баптарын бұзып, еңбек мигранттарының отбасы мүшелеріне ОМС полисін беруден бас тартып отыр.

Мукановтың сөзінше, әңгіме 2014 жылы қол қойылған Еуразиялық экономикалық одақ туралы шарт жөнінде болып отыр. Ондағы «Еңбек миграциясы» бөліміне сәйкес, 96-бапта ЕАЭО елдері келісілген көші-қон саясатын жүргізуге міндетті екені, ал мемлекеттер арасындағы ынтымақтастық адам мен азаматтың құқықтары мен бостандықтарын сақтау қағидаттарына негізделуі тиіс екені айтылған.

Зергерлер неге Қырғызстанға көшіп жатыр?

Ал осы бөлімнің 97 және 98-баптарында ЕАЭО аумағында жұмыс істейтін еңбеккерлер мен олардың отбасы мүшелері жұмыс істеп жүрген елдің азаматтарымен тең дәрежеде әлеуметтік сақтандыру мен жедел медициналық көмек алуға құқылы екені көрсетілген.

Өткен жылдың қараша айында Ресей Мемлекеттік Думасының төрағасы Вячеслав Володин шетел азаматтарына медициналық полис беру шарттары өзгергенін мәлімдеген болатын. Оның айтуынша, енді шетелдіктерге тек кемінде бес жыл бойы елде заңды түрде жұмыс істеген жағдайда ғана тегін медициналық көмек көрсетіледі.

Қырғызстанда валюта айырбастау ережесі өзгерді: енді ақшаның қайдан келгені тексеріледі

Сот шешімі екі апта ішінде шығарылады.