Қазақстан банктері экономиканы кредиттеуді 18,5% ға арттырды ЕАДБ

АСТАНА, 5 мамыр – Sputnik. Еуразия даму банкі ЕАЭО елдерінің экономикасына қатысты апталық макроэкономикалық шолуды жариялады.

Қазақстанда банк сарапшылары кредиттеудің 18,5%-ға артқанын атап өтті. 1 сәуірдегі жағдай бойынша республика қаржы институттары 43,4 трлн теңге (93,8 млрд доллар) көлемінде кредит берген.

Өсім бизнеске берілген кредиттің 20,4%-ға, сондай-ақ халыққа берілген кредиттің 17,1%-ға артуы есебінен болып отыр. Корпоративтік сегментте шағын бизнеске берілген кредит 37,9%-ға, орта бизнеске – 30,7%-ға көбейген.

"Ірі бизнеске арналған кредит портфелі өткен жыл деңгейінде қалып, 6,6 трлн теңгені құрады. Бөлшек сегментте тұтынушылық кредит жылдық есеппен 17,1%-ға, ипотека 16,3%-ға өсті. Несиелеудің кеңеюі экономикалық белсенділіктің жоғары деңгейін сақтауға ықпал етеді", – деп хабарлады банк.

Ресейде сарапшылар 2026 жылдың қаңтар-наурыз айларында ЖІӨ-нің 0,3%-ға қысқарғанын атап өтті. Бұған дейін қаңтар-ақпанда 1,8%-ға төмендеген еді.

"Өнеркәсіп өндірісінің 0,3%-ға өсуі (бұған дейінгі 0,8%-дық төмендеуден кейін) аясында динамика жақсарды. Өсімге негізінен тау-кен өндіру өнеркәсібі ықпал етті (+0,8%), ал өңдеу өнеркәсібі әлі де төмен деңгейде қалды (-0,7%)", – дейді банк сарапшылары.

Бөлшек сауда мен ақылы қызметтер көлемі 3,5%-ға артқан. Ал құрылыс саласы 10%-ға төмендеді.

Арменияда 2026 жылдың қаңтар-наурыз айларында экономикалық белсенділік 7,1%-ға өсті (қаңтар–ақпанда – 7,4%). Негізгі өсімді қызмет көрсету, құрылыс және өнеркәсіп салалары қамтамасыз етті.

"Сыртқы сауда оң динамиканы сақтады: экспорт 4,5%-ға, импорт 4,6%-ға артты. 2026 жылы да экономикалық белсенділік жоғары деңгейде сақталады деп болжанған", – деп мәлімдеді банк.

Беларусьте инвестициялық белсенділік қалпына келе бастады. Негізгі капиталға салынған инвестицияның төмендеуі 2026 жылдың қаңтар-наурызында 3%-ға дейін баяулады (қаңтар-ақпанда – 7,7%).

"Бұған жабдық сатып алудың 1,5%-ға өсуі әсер етті (бұған дейін 3,8%-ға төмендеген). Құрылыс-монтаж жұмыстары әлі де төмен деңгейде, бірақ құлдырау айтарлықтай баяулады. Инвестициялық кредиттеудің 26,9%-ға артуы және талаптардың жеңілдеуі инвестиция өсімінің қалпына келуіне жағдай жасайды", – деп атап өтті ЕАДБ.

Қырғызстанда инфляция 5-7% мақсатты деңгейден жоғары болып отыр: реттеуші деректеріне сәйкес, 17 сәуірде ол 11,3%-ды құрады (наурызда – 11%).

"Мөлшерлеменің сақталуы инфляциялық қысымның тұрақты болуымен байланысты. Негізгі факторлар – азық-түлік пен шикізаттың әлемдік бағасының өсуі, сауда серіктестеріндегі жоғары инфляция және электр энергиясы тарифтерінің қымбаттауы. Осы жағдайда Қырғызстан Ұлттық банкі 2026 жылдың соңына дейін мөлшерлемені 12% деңгейінде ұстайды деп күтеміз", – деп түйіндеді сарапшылар.