Қазақстан дәріханаларында антибиотиктер мен жүрекке арналған дәрілер қайта сатылған

Қазақстанда дәріханалар арқылы 26 000 қаптама "тегін" дәрі-дәрмек қайта сатылған, деп хабарлады Денсаулық сақтау министрлігі. Тengri Health тілшісі нақты қандай препараттар туралы сөз болып отырғанын анықтады.

Қанша "тегін" препарат сатылған?

Өткен аптада цифрлық таңбалау жүйесі арқасында Қазақстанда емханалардағы дәріханалар арқылы пациенттерге тегін берілуі тиіс 26 мыңнан астам қаптама дәрі-дәрмек сатылғаны белгілі болды.

Олар бөлшек саудадағы дәріханалар желісіне түскен.

Денсаулық сақтау министрлігінің Медициналық және фармацевтикалық бақылау комитетінің мәліметінше, мәселе антибиотиктерден бастап, жүрек аурулары мен қант диабетін емдеуге арналған препараттарға дейінгі түрлі дәрі туралы болып отыр.

"Анықталған препараттар арасында инфузияға арналған ерітінділер, соның ішінде натрий хлориді мен глюкоза, сондай-ақ жүрек-қан тамырлары аурулары, қант диабеті, инфекциялық және басқа да аурулар кезінде қолданылатын дәрілер бар. Атап айтқанда, "Кантаб", "Зитмак", "Короним", "Бисопролол", "Аторвастатин-Санто", "Форсига", "Цеф III" және басқа да препараттар анықталды", - деп нақтылады комитет.

"Кантаб", "Короним", "Бисопролол" және "Аторвастатин-Санто" - негізінен жүрек-қан тамырлары аурулары мен қауіп факторлары кезінде қолданылатын препараттар. "Форсига" - қантты төмендететін препарат, "Зитмак" және "Цеф III" - антибиотиктер.

"Тегін" дәрі-дәрмектерді қайта сату фактілері анықталғаннан кейін комитет 106 медициналық ұйым мен дәріхананы тексерді - оның 64-і әкімшілік жауапкершілікке тартылды.

Айыппұлдың жалпы сомасы 20,8 миллион теңгеден асты. Алдын ала шығын 36 миллион теңгеден асады деп бағаланып отыр. Тағы 68 субъектіге анықталған заңбұзушылықтарды жою туралы нұсқама берілді.

Бұған дейін Қазақстанда маркетплейстерде антибиотиктерді сатуға тыйым салу жоспарланғаны туралы жазған болатынбыз.

Бізді Google-дың негізгі дереккөздер тізіміне қосыңыз

Денсаулық сақтау министрлігі

Қазақстан

дәріхана

Дәрі-дәрмек