Қазақстанда дәрілер арзандай түсті

Келер жылға дәрі-дәрмек сатып алу аясында 36 млрд теңгеден астам қаржы үнемделген. Яғни көптеген препараттардың бағасы 2025 жылмен салыстырғанда 50-300% аралығында төмендеген.

Бұл Денсаулық сақтау министрлігі қолға алған бірқатар өзгерістің арқасында мүмкін болып отыр. Нақтырақ айтқанда, дәрі-дәрмекке баға белгілеудің жаңа цифрлық жүйесі іске қосылды. Яғни өндіруші бағасын тіркеудің бірыңғай тәсілі енгізіліп, маркетингтік және көлік үстемелері алып тасталды. Тағы қымбат препараттардың қолжетімді баламасы 30% дейін арзандай түскен. Осының арқасында нарық қатысушылары үшін бірыңғай және ашық ережелер қалыптасты. Енді мемлекет халықты қосымша дәрі-дәрмекпен қамтамасыз етуде отандық фарм компаниялардан препараттарды арзан бағада сатып алады. Мәселен, қазір «Иматиниб» дәрісі 9450 теңгеден 2348 теңгеге, ал «Бевацизумаб» препараты 360 мың теңгеден 77 мың теңгеге дейін арзандаған. Негізі қымбат онкологиялық препараттардың 66 түрі бойынша баға төмендеген.