Қазақстан ECI де 55 орынға көтерілді: сарапшы пікір білдірді

2023 жылы Қазақстан Экономикалық күрделілік индексінде (ECI) 89-орында болып, көрсеткіші -0,44 деңгейінде бағаланған еді. Алайда кейін жарияланған жаңартылған редакцияда сол жылдың деректері қайта қаралып, республика 0,45 оң мәнімен 52-орынға көтерілді. Осы өзгерістен кейін Қазақстан 2023 жылдан бастап күрделі экономикасы бар елдер қатарына енді.

2024 жылдың қорытындысы бойынша ел 55-орынға тұрақтады. Яғни, өткен жылғы 52-орынмен салыстырғанда үш сатыға төмендегенімен, жалпы динамика экономикалық құрылымдық ілгерілеуді көрсетеді.

Атап айтқанда, 2020–2024 жылдар аралығында Қазақстан 87-орыннан 55-орынға дейін көтеріліп, 32 позицияға алға жылжыды. Бұл – өңір елдері арасындағы ең айқын өсімдердің бірі.

Салыстыру үшін айтсақ, осы кезеңде Өзбекстан 86-орыннан 70-орынға, Қырғызстан 78-орыннан 72-орынға, Түрікменстан 127-орыннан 126-орынға көтерілді. Ал Ресей керісінше 38-орыннан 67-орынға төмендеді.

Айта кету керек, Қазақстанның 2025 жылға дейінгі стратегиялық даму жоспарында ECI бойынша 55-орынға жету мақсаты қойылған болатын. 2024 жылғы нәтиже осы межеге мерзімінен бұрын қол жеткізілгенін көрсетеді.

Халықаралық бизнес-стратег Алекс Матссон Kazinform агенттігіне берген сұхбатында рейтингтегі ілгерілеу экономиканы әртараптандыру мен институционалдық реформалардың нәтижесі екенін атап өтті.

— 89-орыннан 55-орынға көтерілу бәсекеге қабілетті әрі технологиялық тұрғыдан күрделі экономикалық модельдің қалыптасып келе жатқанын білдіреді, — деді сарапшы.

Оның айтуынша, бұл көрсеткіш өнеркәсіпті жаңғыртуға, экспорттық әлеуетті кеңейтуге және адами капиталды дамытуға бағытталған жүйелі мемлекеттік саясаттың жемісі.

Сарапшы сондай-ақ Қазақстанның Еуропа мен Азия арасындағы стратегиялық орналасуы, институционалдық тұрақтылығы және халықаралық ынтымақтастыққа ашықтығы инвестициялық тартымдылықтың артуына ықпал етіп отырғанын айтты.

Осылайша, индекстегі позицияның жақсаруы тек статистикалық деректердің қайта қаралуымен ғана емес, экономиканы әртараптандыруға және шикізаттық модельден біртіндеп алшақтауға бағытталған құрылымдық өзгерістермен байланысты.

Бұған дейін Қазақстан Еуразия өңірі елдері арасынан тікелей шетелдік инвестиция тарту қарқыны бойынша көшбасшылар қатарына енгені хабарланған еді.

Ағылшын тіліндегі мәтіннің түпнұсқасын мына жерден оқуға болады.