Қазақстан мұнай транзитін қайта жоспарлап, экспорттық бағыттарын өзгертті

Қазақстан «Достық» жүйесі бойынша транзит графигінің өзгеруіне байланысты мұнай экспортының көлемін қайта бөледі.

Энергетика министрлігі хабарлағандай, сөз 2026 жылдың мамыр айында Германияның «Шведт» мұнай өңдеу зауытына (МӨЗ) бағытталған жеткізілімдер туралы болып отыр.

Қайта бөлінетін мұнайдың жалпы көлемі 260 мың тоннаны құрайды. Оның ішінде 100 мың тоннасы — Усть-Луга портына бағытталады; 160 мың тоннасы — Каспий құбыр консорциумы (КҚК) жүйесіне жіберіледі.

Ведомство ағындарды қайта бағыттау жүк жөнелтушілермен келісілгенін және жедел (операциялық) сипатқа ие екенін атап өтті.

«Тасымалдау бағыттарының өзгеруі жылдық мұнай өндіру жоспарының орындалуына әсер етпейді. Қолданыстағы көлік инфрақұрылымы Қазақстанға экспорттың тұрақтылығын және әлемдік нарықтарға шикізатты үздіксіз жеткізуді толық көлемде қамтамасыз етуге мүмкіндік береді», — деп хабарлады Энергетика министрлігі.

Осылайша, Қазақстан «Достық» бағытындағы түзетулердің орнын бұрыннан қалыптасқан баламалы бағыттар есебінен толтыруды көздеп отыр.

Бұған дейін Ресей 1 мамырдан бастап «Достық» мұнай құбыры арқылы Германияға қазақстандық мұнай транзитін тоқтататыны хабарланған болатын.

Бүгін, 11:54