Қазақстан шешен оппозиционерін Ресейге беруге келісті

Қазақстан Республикасының Бас прокуратурасы шешен оппозиционері Мансур Мовлаевқа босқын мәртебесін беруден бас тартып, оны Ресейге экстрадициялау туралы сұранысты қанағаттандырды. Адвокаттардың айтуынша, оны Ресейде саяси қудалау мен өлім қаупі күтіп тұр, деп хабарлайды Arasha.kz.

Бұл туралы өткен аптада адвокат Мұрат Адам өзінің Facebook парақшасында хабарлады. Оның сөзіне қарағанда, Бас прокуратураның бұл шешіміне шағым түсірілмек. 

«Біз Мансур Мовлаевқа босқын мәртебесін беруден бас тарту туралы шешімге қарсы шағымдандық. Алдын ала тыңдау 11 ақпанға белгіленді», — деп жазды Адам.

Мансур Мовлаев 2022 жылдан бері Шешенстанда қудалауға ұшыраған. Ол саяси себептермен ұсталған болатын. Кейін жергілікті түрмеден қашып шығып, 2023 жылы Қырғызстанға өткен. Онда ол қайтадан жарты жылға бас бостандығынан айырылып, кейін депортациялау туралы шешім шығарылған.

2025 жылдың мамыр айында Мовлаев Қазақстанға заңды түрде кірген, алайда оны Алматыдағы сауда орталықтарының бірінде күш құрылымдары ұстады. Осыдан кейін ол жұртшылық пен құқық қорғаушылардан босқын мәртебесін алуға көмек сұраған еді. Тамыз айында оның уақытша мәртебесі ұзартылған болатын.

Бірақ желтоқсан айының соңында бас тарту туралы шешім келді. Белсендінің айтуынша, бұл шешім ол үшін «өлім жазасымен тең».